Waxaan maqlayay oo aan bahwaynta saxaafada baryahan kala socday in magaalada taleex oo ka tirsan gobolka Sool in ay beryahanba ku qul qulayeen ergooyin ka soo kale jeeda beelaha dhulbahante oo u balansan in shir wada tashi halkaa uga furmo , dawlada Somaliland waxay marar badan ka hadashay in shirarka beelaha arimaha dhexdooda iyo arimaha kale ee ay tabanayaan ay kaga arinsanayaan u furan tahay sida kuwii hore uga dhacay Somaliland ee ay ka midka ahaayeen kii ay qabsatay beesha Isaaq Habar Jeclo , beesha Isaaq Ciise Muuse iyo beelaha kale ee daga Somaliland kuwaas oo ay ahaayeen kuwo ay kaga tashanayeen aayahooda iyo masiirkooda reereed laakin aanay marnaba ahayn kuwa xidhidh la lahaa oo wax lagu yeelaynayay qadiyada madax banaanida Somaliland, hadaba sidaynu ka war qabo shirkan ay isugu habar wacatay beesha dhulbahante ayaa dadka u dhuun daloolaa ay sheegayaan inaanu ahayn shir lagaga arinsanayo arimaha beesha dhexdooda balse ay tahay shir lagu wiiqayo qaranimada Somaliland kuwaasi oo aan qarsan laakin badka soo dhigay taas oo ka hor imanaysa mabda’ii lagu sameeyay qaranimada Somaliland, hadaba Somaliland oo labaatankii sano ee ugu danbeeyay ahayd mandaqad lagu wada noolaa nabad iyo caano ahaydna qaran ku caano maalay kala danbayn , isu tanaasul, wada tashi, isqancin iyo horumar balse waxaa muuqata in loo soo tashaday in wax la yeeleeyo qarankan ku wareegsan mandaqada holcaysa oo la doonayo in loo tashato oo la wax yeeleeyo qaranimadiisan , hadaba waxaa muuqata in shirkan taleex ka dhacayaa uu baal marsan yahay arimahaa aynu soo sheegnay waxaana isugu yimi rag aan qarsan marnaba inaanay ka raali ahayn nabada ka jirta Somaliland kuwaas oo si cad uga soo horjeeda iyagoo waliba marwalba ka hadla wax lidi ku ah qaranimada qarankan iyo jiritaankiisaba, hadaba waxaa haboon in xukuumada Somaliland ay wax ka qabato ka hor intii aanu shirkasi si toosa u bilaabmin ee lagu gudo jiray abaabulkiisa taas oo aynu arkayno in bishu horteena timid balse soomalida ayaa ku maahmaahda (Daad hortii ayaa moos la samaystaa),waxaana wax aan laga aamusi Karin ah in maanta aynu indhaheena ku arkayo shir si cad loogaga so horjeedo qaranimada Somaliland inuu ka dhacayo isla gudaha Somaliland, waa xil saaran xukuumada ay shacabku soo doorteen in cid kasta oo ka soo horjeeda ama ku soo xad gudubta qadiyada lagu midoobay ee Somaliland dabka la saaro oo gacan bir ah lagu qabto ,waana arin ay ka midaysan yihiin dhamaan qabiilada wada daga Somaliland ayna ku heshiiyeen wakhtigii la aasaasay wadankan Somaliland.hadaba shirkan taleex ka socda ayaa ay ka soo qayb galeen ragii ugu waawaynaa ee waligood ka soo horjeeday Somaliland kuwaas oo la filayo inay ku dhawaaqi doonaan maamul goboleed la yidhaahdo DARWIISH STATE taas oo adhax jab ku noqon doonto qadiyada Somaliland oo aynu hore uga war hayno in maamul goboleed isna isku magacaabay AWDAL STATE hore lagaga dhawaaqay Qurbaha kaas oo fara galin ku haya Somaliland oo meel kasta oo ay tagaan ay iyaguna xumayn iyo xiqdi la daba taagan yihiin. hadaba maamul goboleedkan maalinba la sheegayo in lagaga dhawaaqayo meel ka mid ah Somaliland miyaanay ahayn xad gudub lagu sameeyay shirkii ay beelaha somaliland oo dhan ku heshiiyeen ee ka dhacay magaalada burco. Hadaba si kastaba ha ahaatee waxaa marag ma doon ah in ku dhawaaqidii lagu dhawaaqay Somaliland ay kala badbaadisay beelihii isku cadhaysnaa ee uu aarsiga iyo dagaalada sokeeye ka dhex dhici lahaa kuwaas oo iyagoo ka tashanaya aayahooda iyo masiirka caruurtooda isla gaadhay inay ku midoobaan qarankan mucjisada ah ee sida dayaxa u iftiimaya ee ka soo mudh yidhi mandaqada geeska Africa ,sidoo kale qabiilooyinkii kala duwanaa ee degenaa Somaliland ayaa iyagoo eegaya isla qaatay nabad buuxda iyo walaaltinimo ku qotonta wax wada qaybsi , wax wada lahaansho, iyo inay dhif iyo dheefba isla wadaagaan ugu danbayntiina waxay salka u dhigeen oo ay aasaaseen iyagoo ku raaliya oo ku qanacsan qarankan la yidhaa Somaliland, hadaba intaa ka bacdi distoorkii iyo wada heshiishkii ay dhigteen qabiilooyinkani ayaa sababay inuu dalkani horumarka intaa leeg ku talaabsado iyagoo maanta hiigsanaya figta ugu saraysa kuna sii jeeda iyagoo gacmaha is haysta inay baadi doon u galaan ictiraafkii jamhuuiyadan, hadaba ayaamahan waxaa ifafaalaheedii soo baxayaa oo la arkayaa dad badan oo ka xun midnimadaa iyo wada jirkaa ay ku midoobeen qabiiloyinka Somaliland kuwaas oo aan ku qanacsanayn wada noolaanshaha iyo wada jirka bulshada wada deggen oo hadda doonaya inay dib boodhka uga tumayaan shir beeleedyo lagu wiiqayo qarankan oo laga soo gudbay labaataneeyo sanadood ka hor iyagoo dadka caamada ah ee wax ma garatada ah u tusaya in la haysto wadankoodii laguna soo duulay balse waxay baalmarsan yihiin in dadka ay farta ku fiiqayaan ay yihiin dadkii ay wax wada lahaayeen ilaahayna dhulka ku wada uumay ee ay wax la qaybsan lahaayeen, hadaba iyadoo aynu ka war hayno in maalinkasta ay isasa soo tarayaan shirarkan noocan oo kale ah ayaa ay xukuumada somaliland indhaha ku daawaynaysaa taas oo dadka falanqeeya arimaha siyaadu ku sheegeen inay tahay midnimadii Somaliland oo maalinba garab la goynayo kuna dhaliileen dawlada inay ka gaabisay wax ka qabashada arimahasi iyadoo horena loogu dhawaaqay maamul goboleed la yidhaa AWDAL STATE oo dadkii ku dhawaaqay in ka mid ah ay dhex mushaaxayaan Somaliland, guntii, gabagabadii iyo gunaanadkii anigoo diidan inuu qalinku ila taraaro waxaan hadalkayga ku soo afjari lahaa hadii aanay xukuumada Somaliland tahli karayn inay wax ka qabato dadka hadhka cad burburinaysa qarankani meesha ha u banayso dadka awooda u leh hadii kale oo waxba laga qaban kari waayo waxaan hadal ka taagnayn in Goroyo Heeryaysani Ay Duhur Cad Soo Gali Doonto Somaliland horseedi doontana burburka qarankan.
C/fataah Sh.Nuux Jaamac ( Suldaanka)
Email: Samriye99@hotmail.com
Mobile: 4474468
