Maansadani waxa ay tilmaamaysaa u soo hillawga qofku u soo hilloobo dalkiisa iyo dadkiisa waxaanu Hal-abuurku ku sifaynayaa Hargeysa iyo sida ay kashiisa ugu sawiran tahay, waxaanu tibaaxayaa waxyaabaha ay Hargeysi ku caana maashay iyo tilmaamaheeda .
Hor Allee dharaartaan
Ka hadaafay gayigeen
U baqoolay hawl kale
Hurdo saani uma bogan
Hiyigaygu goornaba
Hagaag uma shaqaynoo
Hoygaan ku ababiyo
Hargeysuu tabaayoo
U harraadan yahay wali,
Garaadaw haddeertana
maankani hugmaayaa
Halaan-hal buu i leeyay
Dhimbiil igu huraysa
Hogaynaysa laabtoo
Dal-tabyadu hubaysee
Hawraarta maansiyo
Dhakhso hees u qaadoo
Hiimada ilmada kulul
Aan u helo ayaan qudha
Hawraar dawaysiyo
Heello aan ka daawado
Hargeysiyo dadkaygii,
Aniguna Hargeysaa
Hooyadii dalkaygaay
Halbeegii dhulkaygaay
Hadhac lama huraaneey
Hoos lagu qaboobiyo
Hogol lagu badhaadhaay
Hoodiyo barwaaqooy
Hoy nabad ku caanaay
Inaan kugu hadaaqoo
Hibashada naftaydani
Kugu hirato adigoo
Hillaacaagu ii baxo
saw ma tihid halbawlaha
dhiigayga habayiyo
Hedda aan ku nooliyo
Hawadaan ku soo koray,
Herereey Hargeysaay
Hoy baad ku leedahay
Hareeertayda bidixoo
Wadnahayga Hoos yaal
Hantidaada weeyoo
Adaan kuu hilloobee
Hargeysaay ma nabad baa ?
Haabkayga kama go’in
Ciidaada hodankiyo
Xareedaada hoortiyo
Caanihii hor-weyntiyo
Hibaaqii dhirtaadee
Hobaladu amaaneen,
Nafi waxay u hotayaa
Hawl yari ku gama’daa
Meel aanay hiifiyo
Ka soo gaadhin hadimoo
Haybadeeda sharaftiyo
Hantideeda lagu dhicin,
Waxa loo hayaamaa
Badi loo han-weyn yahay
Nafta lagu hagaajaa
Hoy laga samaystaa
Meel aanay huriniyo
Hayb-hayb qabiiliyo
Hal-gaad aan lahaynoo
Loo wada hammuun qabo,
Lama hura Hargeysaay
Halalkaa sareen dhigay
Adigaa ku hodanoo
Astaantaadu waa hibo
Hablo-naaso kugu taal,
Hormoodkii xorriyadaay
Himilada dalkaygiyo
hagihii aqoontaay,
Hagoogtii saboolkana
Halasaha ka dhawrtiyo
Barta loogu hiishaay,
Hanqal taaga xiisaha
Ma hilmaamo ruuxii
Hargeysaay ku soo maray
Kugu laday habeen qudha,
Hubaal weeyi Herereey
Hinqashada xagaagiyo
Inuu kugu hawaawiyo
Hal-hayskiisa kaa dhigo,
Hiddo diintu hagaysiyo
Hoo ruux ku caan baxay
Hidin iyo waxsiinba le,
Halyay geesi hanadoo
Hal-qabsiyo tilmaanba leh,
Haween gaari qalanjiyo
Hufnaaniyo hubqaadba le,
Hal-abuur murida hela
Waayeel murtida haga
Hal-adayg u dheer yahay,
Adigaa ku hodanoo
Astaantaadu hibo tahay
Hablo-naaso kugu taal,
Hargeysaay ha dheeliyin
Sahraa kuugu heestee
Maantana hormoodiyo
Meel la hiigsadaad tee
Ha hantaaqmin waligaa.
Waxa tiriyay: Cabdiraxiim Cismaan Maxamed
Email: Guudle-11@hotmail.com
Email: ibnuothman.mohamed@facebook.com