Boorame, (SLpost)- Gudoomiyaha Urur siyaasadeedka Wadani Md. Cabdiramxaan Maxamed Cabdilaahi (Ciro) isla markaana ah Gudoomiyaha Golaha Wakiilada Somaliland iyo wafti balaadhan oo uu Hogaaminayo ayaa si weyn loogu soo dhaweeyey Magaalo Madaxda Gobolka Awdal ee Boorama.
Gudoomiye Cabdiramaan Ciro sidoo kale waxa uu maanta soo maray Magaalda Dila halkaasi oo ay ku soo dhaweeyeen dad weyne tiro badan, waxana uu isla maantaba Gudoomiye Ciro xadhiga ka jaray xafiiska ururka Waddani uu ku yeelanayo Magaalada Boorama.
Gudoomiyaha Urur siyaasadeedka Wadani Md. Cabdiramxaan Ciro ayaa waxa duleedka Magaalada Boorama ku soo dhaweeyey kumanaan dadweynaha Magaalalaasi ah, waxa ay dadweynahaasi iyo Gaadiid ay wateen ay Masuuliyiinta u galbiyeen dhinaca Boorama.
Weftiga Ururka Wadani iyo Gudoomiye Ciro ayaa markii uu gaadhay Magaalo madaxda Gobolka Awdal ee Boorama waxa uu xadhiga ka jaray xafiiska ururkaasi uu ku yeelanayo Gobolka Awdal waxa uu qubad u jeediyey dadweyne kumanaan gaadhayey oo ka qayb galay munaasibadaasi.
Gudoomiyaha ku meelgaadhka ah ee Ururka Wadani Md.Ciro ayaa waxa uu shacabka Magaalada Boorama uga mahad caliyey soo dhaeynta Balaadhan ee ay ku qaalbileen waxana uu yidhi “ waxaan shacabka reer Boorama ugu mahad celinayaa soo dhaweynta diiran ee ay ku qaalileen aniga iyo waftiga balaadhan ee ka socda urur siyaasadeedka Wadani, hooyada Somalialnd waa Nabada waxana aynu ognahay in nabada Somaliland, nabadaasi oo ah tan lagu faano isla markaana ay kaga duwan tahay Soomaaliya inteedii kale waxa ay ku dhalatay Magaalada Boorama ee gobolka Awdal.”
Gudoomiye Ciro ayaa waxa kale oo uu intaasi ku daray “ iya oo xuquuqda sharciga ah ka faa’iidaysanay ayaa waxa ay muwaadiniin reer Somaliland ah oo ka mida Golayaasha deegaanka, Golaha Wakiilada iyo xubno ka tirsan qaybaha kala duwan ee dadweyne reer Somaliland waxa ay abuureen urur siyaasadeedkan Wadani, waxa aynu soo dhaweynayaa ururada Cusub ee Wadani ka mid yahay kuwii horeba, asxaabtii horena waxaynu leenahay Waa la tar-tamayaaye tarma.” Ayuu tidhi Md. Ciro.
Gudoomiyaha Golaha Wakiilada Somaliand Md. Cabdirmaan Maxmed Cabdilaahi (Ciro) ayaa waxa kale oo uu ka hadlay dhismaha jidka u dhaxeeya Magaalooyinka Boorama iyo Hargeysa waxana uu yidhi, “ Waxaanu soo marnay jidka Boorama iyo Hargeysa u dhaxeeya oo la dhisayo iyada oo lagu wado Tabarucaad ay shacabku leeyihiin isla markaaana ay Xukuumadu ka qayb qaadanayso, jidkaasi uu socdaa shaqo wanaaagsan waa laga hayaa, waxaanu dadweynaha ugu baaqay inay wadaadaasi ka qayb qaataan, Ururka Wadani waxa uu gaar ahaan ku tabarucayaa dhismaha jidkaasi lacag dhan $2000 oo Dollar( Laba kun oo dollar) waxana bixnaya aas aasayaa ururka Wadani.” Ayuu yidhi Md. Cabdiramaan Ciro.
Waxa kale oo Gudoomiyaha Wadani ka hor halkaasi ka hadlay Md. Axmed Muumin Seed oo ka tirsan Aas-aasayaasha ururka Wadani isla markaana ka soo jeeda Gobola Awdal, hadaladiisiina waxa ka mid ahaa “ maanta waxaanu halkan ku soo dhaweynaynaa Gudoomiyaha Ururka Wadani isla markaana ah Gudoomiyaha Golaha Wakiilada Somaliland iyo wafti balaadhan oo ka tirsan ururka Wadani oo maanta marti inoogu ah Magaalada Boorama, waxaan ku leenahay Gudoomiye ku soo dhawoow magaaladaadii Boorama iyo kumanaan ka tirsan dadweynaheeda oo muujiyey taageerada ay u hayaan ururka Wadani.” Ayuu yidhi Md. Seed.
Somalilandpost.net
webmaster@somalilandpost.net
