Hargeysa (SLpost) – Ciidammada Booliska Somaliland, ayaa sheegay in sannadan 2022, ay Somaliland ka dhaceen 27,801 danbi oo iskugu jira dilal, kufsi, shilal, caruur la tuuray, ka ganacsiga maandooriyaha iyo kuwo kale.
Hoggaanka Howlaha Ciidanka Booliiska Sarreeye guuto Ibraahin Cabdi Xaaji Maxamuud, ayaa tirada danbiyada iyo noocyadooda ka akhriyay munaasibad loo qabtay sannad-guurada 29aad ee ka soo wareegtay aasaaska Ciidanka Booliiska Somaliland.
Waxa uu sheegay in 5,565 ka mid ah danbiyada la diwaangaliyay ay beenoobeen, oo caddayn loo waayay, In heshiis lagu dhameeyay 11,320 danbi, isla-markaana ay maxkamaduhu go’aan ka gaadheen 10,916 danbi halka ay baadhisi ku socoto 540 danbi.
Waxa uu sheegay in 60 qof si badheedha loo dilay, isla-markaana ay gaysteen 60 eedaysane, kuwaasi oo 49 ka mid ah gacanta lagu dhigay, halka 11 eedaysane ay baxsad yihiin oo aan wali gacanta lagu dhigin.
Tirada guud ee kufsiyada ayuu ku sheegay 266 kufsi, oo ay gaysteen 280 eedaysane, kuwaasi oo ay qaarkood kufsi wadareed ahaayeen, waxa uu sheegay in la qabtay 240 eedaysane, kuwaasi oo 40 ay baxsad yihiin.
Tirada guud ee shilalka gaadiidka ayuu ku sheegay 5,829, waxa shilalka ku naf waayay 148 qof, halka 3,944 oo qofna ay ku dhaawacmeen, 3,525 baabuur ayaa ku waxyeeloobay shilalka,, 412 neef oo xoolo ah ayaa ku dhintay, halka 124 dhisme uu khasaare kasoo gaadhay.
Tirada Carruurta la tuuray ayuu ku sheegay 40 carruur ah oo 20 ka mid ahi ay dhinteen.
Waxa uu sheegay in booliisku uu qabtay 70,065 litir oo khamri ah, iyo 75 kiilo iyo badh oo xashiishad ah, tirada eedaysanayaasha loo qabtay maandooriyaha waxa uu ku sheegay 94 eedaysane, waxaana lagu qabtay 51 baabuur.
Waxa uu kusoo gaba gabeeyay in tirro ka badan 90 eedaysane loo qabtay falal diinta Islaanka kasoo horjeeda oo ay ku kaceen.
Akhriso Warbixinta fal-dambiyeedyadii Sannadkii Hore ee ka dhacay Somaliland.
https://youtu.be/7_RMIW4CSf4
