Madaxweynihii hore ee JSL oo tacsi u diray Marxuum Cumar Carte Qaalib iyo Marxuum Aadan Yuusuf Abokor oo maanta geeriyooday

 

Hargeysa (SLpost)- Madaxweynihii hore ee Somaliland Md Axmed Maxamed Maxamuud (Siilaanyo), ayaa tacsi u diray qoyska, ehelka, qaraabada iyo Qaranka Somaliland ee uu ka baxay Marxuum Cumar Carte Qaalib oo maanta ku geeriyooday magaalada Hargeysa.

Sidoo kale, waxa uu Md Siilaanyo tacsi u diray Marxuum Dr Aadan Yuusuf Abokor oo maanta ku geeriyooday Dalka Turkiga.

Dhambaal tacsi ah oo ka socda Madaxweynihii hore ee Somaliland oo la soo gaadhsiiyey warbaahinta Somalilandpost.net, ayaa u qornaa sidan:-

Madaxweynahii hore JSL Md Axmed Maxamed Maxamuud (Siilanyo), qoyskiisa iyo dhamaan caruurtiisu waxay tacsi u dirayaan waxgaradka, waayeelka, qoysaskii, eheladii, qaraabadii, iyo shacbiga Jamhuuriyadda Somaliland geeerida ku timi labada marxuum Alle ha u naxariistee Cumar Carte Qaalib iyo Dr Adan Yuusuf Abokor oo ku kala geeriyooday maanta 18 Nov, 2020, Caasimada Somaliland ee Hargeysa & Dalka Turkiga.

Md Siilaanyo ayaa ku sifeeyey marxuum Cumar Carte siyaasi taariikh ku leh dadka af Soomaaliga ku hadla, xilal kala duwana ka soo qabtay xukuumadihii hore Soomaaliya, sidoo kalena kaalin weyn ka qaatay nabadeyntii iyo dib-u-dhiskii Somaliland.

Sidoo kale Marxuum Dr Adan ayuu ku tilmaamay aqoonyahan noloshiisii hore ugu huray wax-u-qabadka bulshadiisa, uguna mutay xabsi darteed laga soo bilaabo xilligii xukuumadihii hore Soomaaliya, ka dibna u guntaday dib-u-dhiska iyo nabadeyntiisa dalka iyo dadka Somaliland.

Waxuu madaxweynahii hore Md Siilaanyo, labada marxuum Ilaahay SW uga baryay inuu naxariistii janno ka waraabiyo, caruurtoodii, qoysaskoodii, qaraabada, asxaabta, iyo shacbiga Somaliland ee ay ka baxeena samir iyo iimaan ka siiyo, aamiin. Aamiin. Aamiin. Aamiin.”