Hargeysa (SLpost)- Madaxwaynaha Somaliland Md Axmed Maxamed Maxamuud (Siilaanyo), ayaa xalay soo saaray wareegto uu ku mabnuucayo in masuuliyiinta dawladda iyo ciidamada kala duwan ee dalku ka qayb-qaataan ololeyaasha Xisbiyada iyo ururada ee doorashada isla-markaana aanay masuuliyiinta dawladdu kaga qayb-qaadan karin Hantida Dawladda.
Digreetada madaxweynuhu soo saaray oo lagu war-galiyey Hay’adda Shaqaalaha Dawladda, laguna socodsiiyey wasaaradaha, hay’adaha kale ee Dawladda, kuwa aan dawliga ahayn iyo ciidamada kala duwan, waxa lagu sheegay inay iska jiraan ka qayb-qaadashada ama inay ka dhex muuqdaan ololayaasha xisbiyada iyo ururada. Sidoo kalena wuxuu uga digay in gaadiidka dawlada lagu dhejiyo istiikarada Musharixiinta ama calaamad urur ama xisbi u gaar ah.
Digreetada madaxweynaha oo uu ku saxeexan yahay Afhayeenka Madaxtooyada Axmed Saleebaan Dhuxul, ayaa u dhigneyd sidan:
u dhignayd sidan:
“Madaxweynaha Jamhuuriyadda Somaliland, Mudane, Axmed Maxamed Maxamuud (Siilaanyo) waxa uu Digreeto Madaxweyne oo Numberkeedu yahay N0: 0264/092012, ku dhaqan geliyey Wareegtadan.
Ku: Dhammaan Wasaaraddaha JSL
Ku: Dhammaan Hay’adaha Madaxa Bannaan ee Dawlada
Ku: Dhammaan Ciidamada Jamhuuriyadda Somaliland
Ku: Hay’adda Sirdoonka Qaranka
Ku: Dhammaan Maamullada Gobollada iyo Degmooyinka
Ku: Guddoomiyaha Guddiga Caddaaladda
Ku: Ururada aan Dawliga ahayn
Og: Hay’adda Shaqaalaha Dawladda
Wareegto Madaxweyne
Madaxweynaha Jamhuuriyadda Somaliland
Markuu arkay: Qodobka 90aad ee Dastuurka Jamhuuriyadda Somaliland,
Markuu arkay: Qodobka 12 aad , faqradiisa 2 aad ee Dastuurka Jamhuuriyadda Somaliland.
Markuu arkay: Qodobka 14aad ee Wax-ka-bedelka iyo Kaabista Xeerka Nidaamka Ururada iyo Axsaabta Siyaasadda Xeer Lr. 14/2011
Markuu arkay: Qodobka 12 aad , faqradiisa 5 aad ee Xeerka Doorashooyinka Golayaasha Deegaanka iyo Madaxtooyada, Xeer Lr.20/2001
Markuu arkay; Qodobka 30aad ee Xeerka Doorashooyinka Golayaasha Deegaanka iyo Madaxtooyada Xeer Lr. 20/2001
Markuu Tixgeliyey: Habsami-u-socodka Doorashooyinka, Hannaanka Dimuqraadiyadda iyo dhex-dhexaadnimada.
Wuxuu soo Saaray
Wareegtadan Maamul oo ka reebaysa:
Ciidamada Jamhuuriyadda Somaliland, Ururada aan Dawliga ahayn, Shaqaalaha Dawladda, Xubnaha Ka tirsan Garsoorka, Xeer Ilaalinta, Guddida Diwaangelinta Ururada Siyaasadda iyo Ansixinta Xisbiyada Qaranka iyo Guddida Doorashooyinka Qaranka;
1) In ay ka mid noqdaan ama ku lug yeeshaan arrimaha Axsaabta/Ururada Siyaasadda, isla markaana u ololeeyaan, taageeraan ama ka soo horjeestaan Xisbi/Urur Siyaasadeed.
2) In dhammaan Mas’uuliyiinta Xukuumadda heer kasta oo ay leeyihiin ku ololeeyaan hantida Dawlada; sida, Lacagta Dawladda iyo Gaadiidka Dawladda.
3) In Boodhadhka iyo Waraaqaha Ololaha Doorashooyinka lagu dhejiyo Gaadiidka Dawladda, Masaajidada, Xafiisyada, Xarumaha Diblamaasiyiinta iyo Ururada Caalamiga ah.”
Wareegtadan madaxweynuhu soo saaray, ayaa sii xoojinaysa go’aan ay guddida doorashooyinka Qaranku ku shaaciyeen inay tallaabo sharci ah ka qaadayaan ciddii si badheedh ah hantida dawladda ugu adeegta cid gaar ah, waxaanay masuuliyiinta xukuumadda ee Xisbil Xaakimka iyo masuuliyiinta kale ee Dawladda ku jira balse ka hawl-gala axsaabta iyo ururrada kale, ka horjoogsanaysaa inay Hantida dawladda ugu adeegaan danaha axsaabta ama ururrada ay ka tirsan yihiin.
SOMALILANDPOST.NET
webmaster@somalilandpost.net
Follow us On
