Hargeysa (SLpost)- Guddoomiyaha Cusub ee Xisbiga Mucaaradka ah ee Waddani Xirsi Cali Xaaji Xasan, ayaa taageeray safarka uu Boqor Cismaan Maxamuud (Buur-madow) ku tagay magaalada Muqdisho, waxaanu ku dooday inaanu jirin sharci madax-dhaqameedka ka horjoogsanaya inay tagaan Soomaaliya.
Guddoomiye Xirsi Cali Xaaji Xasan oo xilka ugu sarreeya hoggaanka Xisbiga Waddani maanta loogu doortay shirweynaha 2aad oo maanta la soo gabo-gabeeyey, ayaa waraysigii u horreeyey ee laga qaado kaga hadlay qodobbo xaasaasi ah oo ku saabsan sababtii kalliftay in isaga wasiirro kale oo uu hoggaaminayaa iska casilaan xukuumaddii madaxweyne Siilaanyo, khilaafka u dhexeeya madaxweyne Muuse Biixi, waxa uu kaga jawaabayo tuhunno lagu xidhiidhiyo inuu ka tirsan yahay Koox-diimeedyo lagu xidhiidhiyo iyo waxa uga qorsheysan haddii guddoomiye Cirro ku guul-darraysto doorashada madaxtooyada iyo qodobbo kale.
Guddoomiye Xirsi Cali Xasan oo la weydiiyey haddii uu jiro urur-diimeedyo lagu xidhiidhayo inuu ka tirsan yahay waxa uu sheegay inaanay waxba ka jirin urur-diimeed uu ka tirsan yahay waligiina aanu xubin ka noqonin.
Guddoomiyaha Xisbiga Waddani oo la weydiiyey uu ka ogyahay safarka uu Boqor Cismaan Buur-madow ku joogo magaalada Muqdisho, waxa uu sheegay inaanu waxba ka ogeyn sabab uu tahay, balse waxa uu difaacay inaanu jirin xeer iyo sharci madax-dhaqameedka u diidaya inay tagaan Soomaaliya
Mar la weydiiyey in Boqor Buur-madow Arrimo siyaasadeed u tagay Soomaaliya isla markaana qayb ka yahay kala-xulista shaqsiyaad la sheegay inay Baarlamaaka Soomaaliya ku metelayaan Somaliland, waxa uu guddoomiyuhu dacaayado lagu bartilmaameedsanayo ku tilmaamay inuu Boqor Cismaan magaalada Muqdisho u tagay arrimo siyaasadeed.
Haseyeeshee, siyaasiyiin dhalasho ahaan ka soo jeeda Somaliland oo jooga Muqdisho, ayaa caddeeyey inuu Boqor Buur-madow u joogo Muqdisho kala xulista shaqsiyaadka la sheegay inay u dhasheen Somaliland eek u tartamaya kuraasta Aqalka Sare ee Soomaaliya, waxaana shaqsiyaasdkaas ka mid ah Wasiirkii hore ee Warfaafinta Soomaaliya Maxamed Cabdi Xayir Maareeye oo soo bandhigay caddeymo muujinaya in Boqor Cusmaan Buurmadow ka mid yahay hoggaanka odayaasha dhaqanka ee ku magacaaban inay metelayaan Somaliland isla markaana uu ku ku biiray waxgaradka Soomaaliyeed ee u diiwaan gashay Wasaaradda Arrimaha Gudaha Soomaaliya.
Marka laga yimaaddo hadalka guddoomiye Xirsi ku dafiray xaqiiqada uu ka ogyahay socdaalka Boqor Cismaan ee Muqdisho, haddana, waxa uu Guddoomiye Xirsi Cali Xaaji Xasan jariimad qaran iyo inuu sharciga dalka ku xad-gudbay, in laga abaal-mariyana mudan yahay ku tilmaamay Qof kasta oo Somaliland u dhashay oo arrimo siyaasadeed u taga Soomaaliya.
Guddoomiyaha ayaa hadalkan kaga jawaabay su’aal laga weydiiyey xanta siyaasadeed ee xisbiga Waddani suuqa u taalla oo ah inuu xidhiidh la leeyahay Soomaaliya, taas oo uu ku tilmaamay dacaayad aan Sal iyo baartoona lahayn.
