Hargeysa (SLpost)- Dawladda Soomaaliya, ayaa dalab yaable u dirtay kooxda caanka ah ee Xiddigaha Geeska oo ka mid ah kooxaha fanka xilligan loogu jecel yahay ee reer Somaliland, isla markaana aad loo dhegaysto heesaha kala duwan ee ay qaadaan.
Guddoomiyaha kooxda Somaliland ee Xiddigaha Geeska abwaan Xasan Saleebaan Dhuxul (Laab-saalax), ayaa Jamhuuriya khadka telefoonka ugu xaqiijiyey shalay inay dalab yaab ku noqday oo martiqaad ah ka heleen dawladda Soomaaliya, gaar ahaan xafiiska Wasiirka Arrimaha Dibadda Mr. Cabdiraxmaan Ducaale Bayle oo kooxdiisa ka codsaday inay safar aan ujeeddadiisa la caddayn ku tagaan magaalada Muqdisho.
“Waxa dhacday in annu ka warhelno martiqaad nooga yimi Soomaaliya si aannu Muqdisho u tagno, laakiin arrintaas iyo dabalkaasba waannu diidnay,” ayuu si kooban u yidhi abwaan Laab-saalax, isagoo ka gaabsaday inuu faahfaahin intaas dhaafsan ka bixiyo martiqaadka loo fidiyey.
Hasayeeshee, ilo-wareedyo kala duwan ayaa Jamhuuriya u xaqiijiyey in ujeeddada dawladda Muqdisho u martiqaadday kooxda Xiddigaha Geeska ee Somaliland ay la xidhiidho in iyagoo calanka Soomaaliya huwan ay safarro ku maraan degmooyinka kala duwan ee Xamar iyo qaybo ka mid ah gobollada kale ee dalkaas si bulshada Soomaaliyeed ee qurbaha ku dhaqan loo tuso in nabad iyo xasillooni ka jirto caasimadda.
Sida ilo-wareedyadu tilmaameen dawladda Soomaaliya, gaar ahaan wasiirkeeda khaarajiga, ayaa kooxda Xiddigaha Geeska u sameeyey ballanqaad ah in lacagta ay dalbadaan la siin doono haddii ay oggolaadaan inay safar ku tagaan magaalada Muqdisho, iyadoo dawladdu doonayso in xidigaha geeska oo calanka Soomaaliya huwan ay hadallo kala duwan oo muujinaya ammaanka iyo xasilloonida ka jeediyaan xaafadaha Muqdisho, si saxaafaddu u baahiso, isla markaana u noqdaan borobagaando iyo dhiirrigelin dawladdu ku doonayso inay ku soo jiidato qurba-joogga Soomaalida, balse waxay dalabkaas kala kulantay diidmo kagaga timi kooxda Xiddigaha Geeska oo ah dhallinyaro reer Somaliland oo fankoodu aad u soo shaac-baxay.
Dawladda Soomaaliya, ayaa la sheegay inay diyaar u tahay in lacag kastoo kooxdu qabsadaan ay ugu soo dirto xawaaladaha caasimadda Somaliland Hargeysa si ay Muqdisho u tagaan, haseyeeshee, waxay masuuliyiinta maamulka Xamar ka dalbadeen in marka hore Xiddigaha Geesku keenaan qof dammiinul-maal ah oo Muqdisho jooga, kadibna lacagta loogu diro Hargeysa, laakiin arrimahaas oo dhan waxa ku gacan-saydhay fannaaniinta oo arrintaas u arkay mid lagu dilayo sumcadda iyo karaamadooda dhaawacaya, maadaama ay yihiin dhallinyaro reer Somaliland ah oo dhegsigooda aad looga jecel yahay dhammaan dhulka bulshada Soomaalidu ku nool yihiin.
XIGASHO: Jamhuuriya
