Hargeysa (SLpost)- Wasiirka Wasaarada maaliyadda JSL Mudane Cabdicasiis Maxamed Samaale ayaa soo saaray wareegto lagu dhaqan gelinayo Cashuurta ku dhejinta Tigidhada ee lagu magacaabo (Revenue Stamp).
Wasiirka maaliyaddu waxa uu wareegtidiisa ku socodsiiyey madaxda wasaaradaha iyo hay’adaha madaxa bannaan ee dawladda inay dhaqan geliyaan wareegtadan isaga oo wasiirku dadweynahana ku wargelinaya in tigidhada cashuurtan ay ka heli karaan xafiisyada cashuuraha barriga ee gobolada iyo degmooyinka dalka.
Geesta kalena kulan lagaga hadlayey dhaqan gelinta iyo is-ticmaalka tigidhada cashuuraha ayaa maanta ka qabsoomay magaalada Boorame ee gobolka Awdal.
Kulankan oo ay ka soo qayb galeen saraakiisha ciidanka ee kala duwan, mulkiilayaasha Nootaayooyinka, madaxda garsoorka ee gobolka Awdal, gudoomiye ku xigeenka golaha deegaanka ee Boorame, xoghayaha dawlada hoose iyo xeer ilaalinta gobolkaasi.
Kulankan oo uu shir gudoominayey Gudoominayey ku xigeenka maamulka gobolka Awdal Cabdi Nuur Sugaal ayaa waxaa warbixin tilmaamaysa habka isticmaalka tigidhada cashuuraha ka jeediyey la taliyaha waaxda cashuuraha berriga ee wasaaradda maaliyadda Aadan Nuur Lo’-doon isagoo sheegay in maalinta Sabtida ah ee 12 bisha May uu dalka Somaliland oo dhan ka dhaqan-gelayo habka tigidhada cashuuraha.
Tigidhada cashuuraha ku dhejinta oo u qaybsan afar qay-bood ayaa qiimahoodu kala yihiin 1,000 SLShilling, 6,000 Sh. SL, 10,000 Sh.SL iyo 20,000 Sh.SL.
SLpost News/Hargeysa
