Burco, (SLpost)- Madaxweynaha Somaliland Md. Axmed Maxamed Maxamuud (Siilaanyo) iyo wefti uu hogaaminayo ayaa socdaal ku tagey deegaanada bariga Somaliland.
Socdaalka Madaxweynaha oo ay ku wehelinayaan Wasiirka Madaxtooyada, Wasiirka Waxbarashada, Wasiirka Daakhiliga, Marwada 1aad, Guddoomiyaha Xisbiga KULMIYE iyo masuuliyiin kale. Madaxweynaha iyo weftigiisu waxay socdaalkooda ku mareen deegaanada Haro-sheekh, Xaaxi, Oodweyne, isla markaana waxa uu xalay u hoyday magaalada Burco, halkaasoo iyana si balaadhan loogu soo dhaweeyay gelinkii dambe ee shalay.
Madaxweynaha oo la hadlay dadweynaha ku dhaqan degaanka Haro-sheekh oo ka tirsan Gobolka Oodweyne waxa uu yidhi, “Waan dhegaystay hadalada aad soo jeediseen, waan ogahay baahiyaha dhulka yaala, wadooyinka waanu soo marnay, hawlaha idiin yaala iyo xilalka dawlada laga sugayaaba waydinkaa si cad noogu tilmaamay, muddo badan xukun maanaan hayn, laakiin baahida dalkuna aad bay u badan tahay, awooddeenana waad malayn kartaan, laakiin wixii imika laga bilaabo hawlihii aad soo hadal qaadeen inaanu wax ka qabano, waxa ila jooga, Wasiirka Daakhiliga oo aan u dayn doonaa arrimaha saldhiga.”
Sidoo kale, ka hor intii aanu Madaxweynuhu gaadhin Deg. Oodweyne waxa uu sii maray degaanka Xaaxi, halkaasoo uu ku amaanay wax-qabad dhinacyo badan leh oo ay dadkaasi ku talaabsadeen. Isla markaana waxa uu tilmaamay inay dawlad ahaan dhinacooda wax la qaban doonaan.
Magaalada Oodweyne oo Madaxweynaha iyo weftigiisa loogu qado kariyay, ayuu Madaxweynuhu meel fagaare ah kala hadlay dadka degaankaas, waxaanu tilmaamay inay fullin doonaan ballan-qaadyadii ay hore u sameeyeen, isla markaana waxa uu ka hadlay waxqabadka Xukuumaddu ku tallaabsatay muddadii ay xilka haysay. Waxana uu ballanqaaday Madaxweynuhu inay Oodweyne ka dhisayaan saldhig boolis. “Dhibaatooyinka iyo hawlaha aad sheegateen waa qaar u baahan wax ka qabasho, waxaanu is-leenahay muddadii gaabnayd ee maamulkani jiray wax badan ayaanu isku daynay inaanu qabano dhinac walba, hadday wadooyin tahay, tacliinta iyo shaqaalaha oo aanu mushaharkii u kordhinay….Insha allaahu sannadaha soo socdana waanu ka sii kordhin doonaa, geed dheer iyo mid gaabanba waanu u fuuli doonaa baahiyaha dalka, hadday tahay xaga caafimaadka, xaga amniga, xaga tacliinta iyo dhinac kastaba. Xabsigana imika waanu ballan-qaadaynaa inaanu samayno.” Ayuu yidhi Madaxweyne Siilaanyo. Madaxweynaha iyo weftigiisa oo xalay u hoyday magaalada Burco ee xarunta Gobolka Togdheer, ayaa la rajaynayaa inuu dadweynaha magaaladaas kala hadlo fagaaraha Khayriyada maanta.
Safarkan Madaxweynaha ayaa ah kii ugu horeeyay ee uu ku tago degaanadaas tan iyo intii uu qabtay xilka madaxweynenimo, isla markaana qaar ka mid ah dadweynaha Gobollada Oodweyne iyo Togdheer ayaa u arkaya inay booqashadan Madaxweynuhu tahay mid dhiirigelin mudan, maadaama oo ay inbadani aaminsan yihiin in madaxdu dib ugu noqoto keliya waqtiyada ololayaasha doorashooyinka.
SLpost News Desk
somalilandpost [at] yahoo.com
