Djibouti (SLpost)- Wasiirro ka socda Xukuumadda Somaliland, ayaa magaalada Jabuuti kulamo kala duwan kula yeeshay Wasiirka Arrimaha Dibadda ee dalkaas iyo Safiirka dawladda Turkiga u fadhiya magaalada Jabuuti.
Wasiirrada Madaxtooyada, Dib-u-dejinta iyo Qorshaynta Somaliland, ayaa maanta la kulmay Wasiirka Arrimaha dibadda dalka Jabuuti Maxamed Cali Yuusuf oo xafiskiisa ku qaabilay iyo Safiirka Dalka Turkiga u fadhiga dalka Jabuuti, waxaanay ka wada-hadleen Hirgelinta waddo laami ah oo Isku-xidhaysa Somaliland iyo Jabuuti oo Dawladda Turkigu dhismaheeda ballan-qaaday.
Wasiirka Madaxtooyadda Md. Xirsi Cali Xaaji Xasan oo hoggaaminaya weftiga Somaliland, ayaa tafaasil ka bixiyey natiijada kulamadaas iyo waxyaabihiisa lagaga hadlay.
“Waxay ahayd maanta ka dib markii aan kulamo gaar-gaar ah la kala qaadanay Wasiirka Wasaaradda Arrimaha Dibeda ee Dawlada aynu jaarka nahay ee Jabuuti iyo Safiirka Turkey-ga u qaabilsan dalka Jabuuti Kulankii Wasiirka Arrimaha Dibeda Jabuuti.Kulankan ayaa ka qabsoomay xarunta Wasaaradda Arrimaha dibeda ee dalka Jabuuti, guud ahaan wuxuu ahaa kulan u daaran isxog siin , xoojinta xidhiidhka labada dal iyo dardar gelinta jidka isku xidhi doona Jabuuti iyo Saylac,” sidaas waxa sheegay wasiir Xirsi oo boggiisa Facebook ku faahfaahiyey nuxurka kulankaas.
“Sidoo kale waxaanu kala hadalnay sidii dawlada Jabuuti ay dhankeeda taageerro iyo dar-dar gelin uga gaysan lahayd hirgelinta jidkaas isku xidhi doona labada dal Wasiirka Wasaaradda Arrimaha dibeda ee dalka Jabuuti Mudane, Maxamed Cali Yuusuf ayaa dhankiisa si dareen gacaltooyo iyo xidhiidh dawladeed ku dheehan tahay noo qaabilay isla markaana dhankiisa adkeeyey sida dawlada Jabuuti ay mar-walba uga go’an tahay kor u qaadida xidhiidhka labada dawladood ee Somaliland iyo Jabuuti isla markaana dareen fiican ku soo dhaweeyey hirgalinta jidkan. Wasiirka ayaa ku dheeraday xidhiidhka soo jireenka ah ee ka dhexeeya labada dal isagoo sheegay in Dawlada Somaliland iyo Jabuuti ay yihiin laba dal oo ay ka dhaxayso Walaalnimo, Jaarnimo iyo isdhex bulsho,” ayuu yidhi Wasiirka Madaxtooyadda Somaliland.
Md. Xirsi Cali Xaaji Xasan waxa kale oo uu sheegay in danjiraha Turkiga u fadhiya Jabuuti uu daboolka ka qaaday inay dawladiisu ka shaqeynayso hirgelinta jidka isku xidha Saylac iyo Jabuuti oo ay hore u balan-qaaday, isagoo arrimahaas iftiiminayay waxa uu yidhi, “Intaas kadib waxaanu kulan ka qabsoomay Safaraada Dawlada Turkey-gu ku leedahay dalka Jabuuti la qaadanay Safiirka Dawlada Turkey-ga u fadhiya Jabuuti. Ugu horayn waxaanu si qoto dheer uga xog waranay xidhiidhka dheer ee Somaliland iyo dawlada Turkey-ga ka dhaxeeya iyo muhiimada jidka isku xidhaya Jabouti iyo Saylac ee ay hirgalintiisa balan-qaadeen dawlada Turkey-gu.
Safiirka ayaa dhankiisa cabiray qiimaha iyo dareenka uu u hayo shacabka ku dhaqan Somaliland isagoo si qoto dheer uga waramay xidhiidhka taariikheed, diimeed iyo walaalnimo ee ka dhaxeeya labada dal
Sidoo kale wuxuu nooga waramay qorshayaasha dawlada Turkey-ga ee ku aadan dib u dhiska iyo dayactirka goobaha taariikhiga ah ee Saylac iyo hirgalinta jidka isku xidhi doonaa Saylac iyo Jabuuti.”
Wasiirka oo arrimahan ka sii hadlayey, waxa uu intaas ku daray, “Guud ahaan safarkan oo muhiimadiisu ahayd dabagalka Jidka Isku Xidhaya Saylac iyo Jabuuti oo aanu hore balan-qaadkiisa uga haysanay dawlada Turkey iyo abaabulka, dardar gelinta iyo gogol xaadhka jidka isku xidhaya Saylac iyo Boorama ayaa noogu soo dhamaaday rajo fiican iyo diyaar garow xoog badan, Shacabka reer Somaliland meel ay jooganba waxaan ku bogaadinaya sida damiirkoodu ugu soo jeedo dhismaha dalka iyo taabo gelinta Qaranka,” ayuu qoraalkiisa ku sheegay wasiirka Wasaaradda Madaxtooyada Somaliland.
SOMALILANDPOST.NET
