Wellington (SLpost)- Dawladda Israa’iil, ayaa ku gacan saydhay Safiir cusub oo waddan New Zealand u magacaabay inuu u qaabilsanaado waddankaas, ka dib Markii ay dawladda Yuhuuddu ku sababaysay inuu yahay ergay dalkaas u qaabilsan maamulka Falastiiniyiinta.
Safiirka Cusub ee New Zealand u magacowday Israa’iil todobaadkan oo magaciisa la yidhaahdo Jonathan Curr, ayaa laga beddelay safiirka Turkiga u qaabilsan oo tan iyo 2008-dii uu hayay xilkaas, waxaanu sidoo kale arrimaha Falastiiniyiinta u qaabilsanaa dawladda New Zealand.
Wasaaradda Arrimaha dibadda New Zealand, ayaa shaacisay go’aanka Israa’iil ku qaaddacday dibloomasiga oo u diyaar-garoobayey inuu waraaqihiisa magacaabista u gudbiyey madaxweynaha dalka Israa’iil.
“Dhowr maalmood ka hor, Israa’iil waxa ay u soo jeedisay New Zealand inaanay safiir ahaan u aqbalay qof sidoo kale ah wakiil dawladdiisa u qaabilsan maamulka Falastiiniyiin,” sidaa waxa yidhi Wasiirka Arrimaha Dibadda Murray McCully.
Dhinaca kale, afhayeen u hadlay wasaaradda Arrimaha dibadda Isra’iil ayaa go’aan ku tilmaamay mid ka tarjumaya qorshaha siyaasadeed ee ah inaanay wasaarad ahaan dalkooda u ogolaanin dibloomasiyiinta dalalkooda ugu magacaaban maamulka Falastiiniyiinta.
“Waxaanu leenahay siyaasad la wada-ogyahay. Tani maaha mid loola jeedo New Zealand,” sidaa waxa yidhi Emmaneul Nahshon, afhayeenka u hadlay wasaaradda Arrimaha dibadda Israa’iil.
Tallaabadan dawladda Israa’iil go’aan ku qaadatay, ayaa noqonaysay markii u horeysay ee qaaddacdo dibloomaasi waddankaasi u magacaabay, iyada oo ay hore u jireen laba safiir oo ka horeeyey Jonathan Curr, kuwaas oo sidoo kale u qaabilsanaa dawladda New Zealand arrimaha maamulka Falastiiniyiinta, waxaana sababta lagu sheegay dawladda Israa’iil oo aan ka war-haynin
Safaaradda Israa’iil ku leedahay caasimadda dalka New Zealand ee Wellington, ayaa arrintan ku tilmaantay inaanay wax xidhiidh ah la lahayn xidhiidhka ka dhexeeya labada waddan.
Raysal-wasaaraha New Zealand, John Key oo la weydiiyey inay tallaabadani ka tarjumayso farriin dawladda Israa’iil arrimo siyaasadeed uga jeeddo, ayaa sheegay inuu ku hawlan yahay ururinta macluumaadka la xidhiidha qadiyadda si baadhis loogu sameeyo ujeeddooyinka dibloomasiyadeed ee israa’iil uga dan leedahay. Raysalwasaare Key waxa uu qirtay in dawladdiisa loo arkay mid taageersan qadiyadda Falastiin wixii ka horeeyey sannadkii 2012-kii, xilligaas oo ay ku jirtay 138 waddan oo ogolaaday in maamulka Falastiin xubin Kor-joogto ah ku yeeshay Qaramada Midoobay.
Waddanka New Zealand oo ku yaala Bariga Adduunka, waxa ay xuduud xagga badda ah wadaagaan dalka Australia.
SOMALILANDPOST.NET
