Hargeysa(SLpost):-kulan lagaga hadlayey midaynta taakulaynta gargaarka la gaadhsiinayo dadka ay abaaruhu saameeyeen ayaa lagu qabtay xarunta madaxtooyada somaliland.
Kulanka ayaa markii uu dhamaaday waxa warbaahinta uga waramay xoghayaha guud ee golaha wasiirada somaliland isla markaana ah xoghayaha guddida abaaraha Sharmaarke Axmed Muxumed Geelle waxaanu sheegay in kulankaas lagaga wada hadlayey sidii loo midayn lahaa taakulaynta la gaadhsiinayo dadka abaaruhu saameeyeen.
Xoghaye Sharmaarke oo faah faahin ka bixinaya go,aamada laysla qaatay ee kulankaasi ayaa waxa uu hadalkiisa ku bilaabay “
1- Kadib markii dalku galay xaalad xaaluf iyo xoolo la’aan ah abaartuna u muuqatay mid daba dheertay
2- 2- Kadib markii guddidu isla aragtay kaalinta qorshuhu u leeyahay quudinta
3- 3- Kadib markii guddidu isla garatay qiimaha ay leedahay midaynta
· Xoogga, Xeelada, Xoolaha, Xogta iyo Xidhiidhku u leeyihiin in la helo qorshe cad oo lagu hawl galo.
4- 1- Guddidu iyagoo ka taxadaraysa in arin xumo abaar ka darane ay dhacdo in deegaanada qaarna mucaawinooyin badan la iska daba geeyo halka deegaan u dhawna gaajo loogu go’ayo
5- 2- Guddidu Iyagoo ka baaqsanaya in habqan iyo farsamo xumo badan ka dhacdo isdhex qaadka mucaawinooyinka bulshada, hay’adaha samafalka iyo gurmadka dawladuba
Guddidu waxay go’aamisay sidan soo socota:
1- 1- In la adkeeyo xidhiidhka guddiyada heer gobol la leeyihiin guddida heer qaran, halkaas oo laga bilaabay guddida heer gobol ee Awdal/Salel maadama xaalada ugu adag maanta deegaankooda ka taagan tahay.
2- 2- In jihaynta iyo ogolaashaha rasmiga ah ee qaybinta deeqaha ay yeelan doonaan guddida heer qaran oo u maamul daadajin doona heer gobol si looga baaqsado habqan iyo isdhex-qaad
3- 3- In dhawaan qoraal amar ah laga soo saari doono hay’adaha khayriga ah ee ka dhago-adayga in ay u hogaansamaan amarada guddida ee nasteexa ah.
4- 4- Guddidu waxay cod dheer ku adkaynayaan in bulshadu is wada saamaxaan sidoo kalena towbada iyo dembi dhaafka badiyaan si deeqda Alle oo kaliya ayaa lagu kaaftoomaye uu inoogu naxariisto
Waxaa sidoo kale isna goobta hadalo duco iyo dareen badan ka muuqdo ka jeediyey Khadiibka Masaajidka Cali Mataan Sheekh Maxamed Aadan Cadhoole isagoo xusay sida ay maanta lagama maarmaan u tahay in dhinaca iyo dhabarka la isa saaro isla markaana dhan looga wada jeesto lahaa abaartan aafada noqotay taasoo dad iyo duunyaba damaqday.
Wasiirka Wasaaradda Diinta iyo Awqaafta JSL isla markaana xubin ka ah guddida heer qaran ee taakulaynta aabaraha Sheekh Khaliil Cabdilaahi Axmed oo kulankan soo xidhay ayaa si adag uga hadlay hay’adaha khayriga ah ee aan tallo iyo tillmaam ka qaadanayn guddida heer qaran isagoo xusay in ay taasi keentay farsamo xumo iyo faro-ka bax waxaanu Wasiirku u mahadceliyey cidwalba oo gacan iyo garab ka gaysatay gurmadka loogu jiro dadka walaalahood ah ee aan biyo iyo baad toona haysan waxaanu xusay in gurmad ka kooban 3,000 oo qoys ay maalmahan ka bixi donnaan Caasimada Hargeysa kuwaas oo u sii jeeda deeganada Awdal/Salel isagoo adkeeyey doorka xukuumadu kaga jirto gargaarka loo fidinayo dadkaas abaaraha la ildaran.Gudoomiyaha Guddida gurmada abaaraha ee gobolada Awdal/Salel Sheekh Maxamed Daahir Dhawal ayaa isaguna goobta ka xusay muhiimada xidhiidhku leeyahay iyo sida ay lagama maarmaan u tahay in cuddud iyo caqliba maanta la isku daro isagoo xusay kaalinta guddida heer qaran kaga jirto dedaalka iyo gargaarka loo fidinayo dadka abaaruhu halakeeyeen isla markaana duco iyo amaan u jeediyey cidwalba oo deeq iyo damqasho u hibaysay dadkaas xoolo iyo xoog-ba beelay
Wasiirka ayaa sidoo kale duco iyo amaan u soo jeediyey warbaahinta kala duwan ee ku hawlan baraarujinta dadka isagoo sidoo kalena ka codsaday in ay dedaalka sii laba-laabaan,
Isku soo wada duuboo kulankan ayaa noqonaya mid imanaya xili loo baahnaa isla markaana bilow wanaagsan u noqon doonaa qorshe iyo quudin wada socda iyo xoog iyo xeelad wada shaqaynaya.
Sharmake Axmed Muxumed Geelle
Xoghayaha Guud ee Golaha Wasiirrada JSL ahna Xoghayaha Guddida Taakulaynta Abaaraha.