Addis Ababa (SLpost)- Shirkad laga leeyahay waddanka Itoobiya oo fulisay dhismaha Terminal Garoonka diyaaradaha ee magaalada Berbera oo ay tartan u gashay, ayaa ka warbixisay caqabado ay kala kulantay dhamaystirka mashruuca, wakhtiga ay ku qaadatay iyo xaddiga lacageed ee ay macaashtay Mashruucaas oo dawladda Kuwait ka caawisay Somaliland.
Shirkadda oo lagu magacaabo TACON waxa ay qandaraaska ku guulaystay sannadkii 2012-dii, kaddib markii ay ka guulaysatay shirkado ajaanib ah oo ay tartan wada-galeen, waxa ay sheegtay inay mashruuca dhismaha Terminal-ka oo ku fadhiya dhul cabbirkiisu yahay 3,200 Mitir laba-jibbaaran iyo Deyr dhererkiisu yahay 12KM oo lagu wareejiyey Madaarka ku qaadatay Adduun lacageed oo dhan 83 Milyan Bir una dhiganta inta ka badan 4 Milyan oo Dollarka Maraykanka ah, sida uu sheegay Guddoomiye ku-xigeenka Shirkadda Habtamu Mengiste oo u warramay Wargeyska Addis Tribune oo aanu warkan ka soo xigannay.
Madaxweynaha Somaliland Md Axmed Maxamed Maxamuud (Siilaanyo) oo todobaadkii hore socdaal dhinaca hawada ah ku tagay magaalada Berbera, ayaa xadhigga ka jaray Dhismaha Terminalka cusub ee Madaarka Berbera oo maal-gelintiisa ay bixisay Dawladda Kuwait, waxaana munaasibadda daah-furka madaarka ka qayb-galay weftiyo ka kala socday waddamada Itoobiya, Yemen iyo Jabuuti. Wasiirka Duulista iyo Hawada ayaa munaasibadda ka sheegay inay dhismaha Madaarka oo caqabado tiro badan lagala kulmay ay fulisay shirkad laga leeyahay dalka Itoobiya oo Qandaraaska kaga guulaysatay shirkado kale oo Ajaanib, balse wasiirka ma sheegin shirkad kale oo ka qayb-qaadatay dhismaha madaarka.
Haseyeeshee, Guddoomiyaha Shirkadda ayaa waraysiga uu siiyey Wargeyska Addis Tribune ku sheegay in dhammaystirka Mashruuca oo qaatay muddo hal sanno ah ay wada-fuliyeen shirkaddooda TACON iyo shirkad laga leeyahay Somaliland oo magaceeda lagu sheegay Afro-sino Constructing & Invesment. Waxa uu masuulkani intaas ku daray inay mashruuca dhismaha Terminalka Madaarka Berbera oo ah kii ugu horreeyey ee meel ka baxsan dalka Itoobiya ka fuliyaan ay shirkad ahaan ka faa’ideen lacag dhan 3 Milyan Birr una dhiganta $147,500 (Boqol Afartan iyo todoba Kun iyo Shan Boqol)
Qandaraaska oo shirkadda la guddoonsiiyey sannadkii 2012-dii, dhammaystirkiisuna qaatay muddo hal sanno ah, waxa uu masuulkani ka hadlay caqabado sababay dib-u-dhacyo ku yimi hawsha dhismaha, kuwaas oo uu ku tilmaamay inay ku jiraan shaqaale aan u tabobarnayn isla markaana lahayn waayo-aragnimada fulinta mashruucooda oo aanay ka helin gudaha Somaliland, balse markii dambe ka keensadeen Itoobiya.
“Waa Mashruucii u horreeyey ee meesha aanu ka fulinnay ka baxsan tahay Itoobiya, waxaananu ka helnay waayo-aragnimo aanu kula macaamilno shirkadaha waddamada Kale. waxaanu ku samaynay dhammaaan adeegyadii uu u baahnaan lahaa madaarku, sida goobaha lagu baadho alaabta, goobaha ammaanka, qalabka isgaadhsiinta, qalabka lagu gudbiyo alaabta oo qaadi kara culays dhan 200kg, Taangiga biyaha iyo waddo laaami ah oo Gedida diyaaradda ka timaadda,”
“Caqabadihii ugu waaweynaa eenu kala kulannay dhismuhu waxay ahayd cimillada meesha oo aad u kulul bilaha June iyo September iyo sidoo kale dadkii aqoonta u lahaa oo aan joogin waddanka, taas oo nagu qasabtay inaanu dadka ka qaadanno halkan (Itoobiya),” ayuu Eng Habtamu u sheegay Wargeyska Addis Tribune. Isaga oo intaas ku daray, “Waxaanu shaqaynaynay xilliyada habeenkii cimillada awgeed.
Masuulkani waxa uu sheegay inay mashruuca kula tartameen Afar Sirkadood oo mid ka mid ah laga leeyahay dalka Itoobiya, Naqshaqadda Mashruucana ay dejiyeen labada shirkadood oo laga leeyahay waddamada Hindiya iyo Kuwait oo lagu kala magacaabo International Consultants Technocrats iyo Marco Construction
