Badda marka aad cagaha galiso xaaskaagana aad gacanta hayso eed dabaal barayso waa saacadaha kuugu farxadda badan dunid
Iyaba waa yaabe Arooskaygii bil kadib ayaan fasax ka helay xafiiskaygii shaqada waxaanan ku fekeray inaan fasaxaa uga faa’ideeyo xaaskayga ku cusub nolosha qoysnimo. Habeenkii markii aan guriga imi ayaan u sheegay xaaskaygii arinkaan maanta ku fekeray yadna way ku faraxday iina sheegtay inaan Berbera kusoo qaadano fasaxaa gaaban.
.png) |
Xaaskaygii aan jeclaa ayaa garabka i haysata iyadoo faraxsan ayaan ku idhi ina gali badda, cagtaydii ayaan dacalka badda dhigay iyadna badii ayay dacal ka galisay, qunyar qunyar ayaan u soconay, gacmaha ayaan qabtay oon biyihii isku tuuray si ula kac ah, intay
ku dhex dhacday biyihii ayay hafatay, waan ka dhex saaray biyihii kuna idhi maku dabaal baraa, waxayna igu tidhi Haa..Maya..Haa..Maya.. mar labaad ayaan la quusay Baddii, haddana dib ayaan uuga soo saaray, iyadoo Hiin-Raagsan ayaan gacantayda biyo daray oo wajiga kaga saydhay, yaduna intay dartay ayay igu saydhay, marar dhawra ayaan sidaa ku celcelinay ilaa ay biyihii iga dhex carartay anna waan ka daba cararay oo intaan gacanta soo qabtay kaga bajiyay inaan quusinayo, gadhka intay i qabatay wajigana baabcadeeda ii marisay ayay igu tidhi: Gacaliye ha i quusin. Hhhhh waan qoslay waliba aad ayaan ugu qoslay baryada ay cabsidu ku jirto, inta ay yadna qososhay ayuun bay ku luuqaysay heestii ahayd
Doonidii jacaylka ayn raacnee, haynala dawaaftee ku soo bood,
Dusheedayn isku waraysan doonaayee,
Bacaadka ayaan fadhiisanay. Meel raysa oo ay soo gaadheen biyihii baddu ayaan salka dhigay iyadna way i ag fadhiisatay.Dhulka ayay ku sawirtay wadne, laba indhoodna way ku dhex sawirtay kadibna dhibco aad ilin moodo ayay hoos dhigtay il kasta, intay isoo eegtay ayay tidhi ” Xabiibi waagii aynu haasaawi jirnay Inaan hoy kula galo ayaan ku hammiyi jiray, se maanta ayaan xaqiiqsaday Riyadaydii berigaasi inay ii rumowday”, intaan qoslay ayay yadna oyday, madaxeediina dhigtay laabtayda, labadeeda gacmoodna ka buuxsatay dhexdayda, ilintii ka qubanaysay indhaheeda ayaa ku dhacday laabtayda. Ilin aad moodo falaadh lagu ganay jidhkayga ayaa shuf tidhi bartii uu yaalay wadnahaygu ax… ax… waxaan dareemay xanuunka ay ilmadaasi ii gaysanayso, Wadnuhu dhiig ayuu hibitiqayaa indhahana ilin ayaa i dareeraysa, tifiq inta ay tidhi ilintii ayay dhofoorka xaaskayga dhatalaq ku tidhi, inta ay booday ayay sacabadeeeda ku masaxday indhahayga, ana dhunkasho ayaan labadeedii dhaban kaga siiyay Mac..Mac. iyadna sidoo kale intay madaxayga ka buuxsatay hoosna ii soo gundhisay ayay Dhabanka bidix dhukasho igaga nabtay intay indhaha isku qabatay ayay hadana kii kale ku nabtay kadibna qososhay ana waan u qoslay. Alla dhunkashadu macaanaa ayaa afkayga xoog uuga soo baxday intay dhoola caddaysay ayay tidhi ” yaa ku daawada oo sida burcadka kugu dhaashada”.
Neecaw qabow oo kasoo dul kacday badda ayaa dubkayaga martay. Ka warran jawiga? Ayaan ku tuuray Xaaskayga intay dhooleheedii itustay sidii qof qosol hayo ayay tidhi “aduu kuu eeg yahay” intaan qoslay ayaan idhi “Indho-deeraleeyeey ninka isku helay Neecaawdaa qabow iyo Sheekadaada debecsan ayaa ah mid raga ka horeeya”, xaaji iga kala daa amanta ayay si farxad leh ugu dhawaaqday, neecawdii oo dhacaysa iyo codkeedii cudoonaa oo ii baxaya iyo baddii berbera oo hortayda wadhan iyo indhahaygii oo ka dhexbaxay indhii xaaskayga iyo yadii oo igu dhaygagtay ayaan is idhi: bal dunidu may iska ahaato sidaa! qiyaamuhuna muu ku dhaco sidaa!.
Nabadeey.
W/Q: Cabdiraxmaan Maxamed Yuusuf (Cabdi Dhuux)
