Ugu Horayn (ASC), Bacdigeed Midowga dhalinyarada iyo inay yeeshaan marjac laga maamulaa waxay muhiim u tahay da’yartan Somaliland ee majarahabawsan, dhalinyaradan maalinba siyaasi danayste ah iyo Afmiishaar ku guurayo, da’yartan warbaahinta kaga faanaysa reer hebel iyo hadaan hebel sidaa loo yeelin, Da’yartan badaha ku dhamaatay aqoonyahankoodii ardaydii jaamacadaha iyo dugsiyada sare kujirtayna ay hiigsanayaan dal shisheeye, dhalinyaradan ku mashquulsan maalin wax la quuto ee aan maankaba ku haynin dalkan iyo dadkan inaanay cidi u maqnayn ee iyaga uu maankooda iyo muruqooda dugsanayo.
Inkastoo ay aad u badan yihiin dhalinyarada hanka iyo hiigsiga leh ee u han wayn dalkooda hooyo iyo u hagar bixiisa, hadana sida maalin walba inoo muuqanaysa waxay muujinaysaa calaamad guul daro, metelan markaad aragto dhalinyaradii aqoonyahanka ahaa oo urur reereed ka soo dhex hadlaya ku hanjabaya oo ugu muusoonaya reer hebel kale oo aanay waxba dhex marin, markaad aragto dhalinyaradii ururada bulshada oo hayb hayb isu hormaystay hogaankoodana doonaya inay ku doortaan sidii ka dhacday hada daladii dhalinyarada ee SONYO.
Shakhsiyan anigoo SONYO u arka madal dhalinyaro oo ay da’yar aqoonyahan ahi isku hawleen hirgelinteeda inay guulaysato oo la sii dhiirigeliyaana ay mudan tahay, wallow aanay da’yartu ku dhamayn oo ay keliya metesho dhalinyarada Ururada dhalinyarada qaybo ka mida, hayeeshee in ishii keliya ee jirtayna ay qabyaaladowdo oo lagu qaybsado hogaankeeda reero iyo caadadii dalkeena halkaa dhigtay waxay iigu muuqataa ifafaalo xun oo aan lagu sii dhiiran Karin.
Dalada Dhalinyarada SONYO khilaafkeedaas keenay inay doortaan laba Hogaan oo kala madax banaan waxay keenaysaa burbur midnimada ururadii ku midaysnaa dalada iyo in si wadajira loo sii wada shaqeey. Daladuna iyadoo markii horeba ay koobnayd inta ku midowday haday intiina laba tiro ahaan aan kala fogayn u sii kala qaybsamaan laf-jab bay ku tahay dhalinyarada waana in sida ugu dhakhsaha badan laysugu soo dhaweeyaa, oo ku jiqsiida iyo isku muquuninta Codka ama haynta maamulku aanay noqon wax lagu kala adkaado waxaanay sababaysaa in raga iska soo horjeedaa isu-muuqdaan oo is xiniinyo taabtaan, Xal ka gaadhista ugu yaraan SONYOdii jirtayna ay adkaato.
Dalada dhalinyarada SONYO , wasaarada dhalinyarada iyo da’yarta kale ee aqoonyahanka ahba waxaan Soo jeedin lahaa in la aas-aaso Gole dhalinyaro oo heer gobol ilaa heer qaran ah, madal siyaasad ahaan iyo afkaar ahaanba madax banaan oo ka talo bixisa horumarinta dhalinyarada iyo sidii dalkan cududdiisa dhalinyaro laysugu xidhi lahaa loogagana faaidayn lahaa.
Gabagabada Aragtidayda waxaan ku soo koobayaa dhalinyarada reer Somaliland waa isku hayb, waa isku Dan, way is huran yihiin waxaanay u baahan yihiin in laysu ururiyo ee uma baahna in lakala dhex dhigo caqabado iyo afkaaro aan iyaga anfacayn balse cidi ku aflaxayso, dhalinyarada Somaliland waxay u baahan yihiin Horumar ay kaga hakadaan badahan ay ku dhamaadeen oo ay dhulkoodan ka dhigaan mid laysu soo halaago oo loo soo tahriibo.
Intaan Saxay Eebaa ku mahadsan wixii iga qaldamayna shaydaanbaa iska leh
Suleymaan Cabdisitaar Dubad (Samataliye)
+252-63-4430873
Hargeysa Somaliland
