ARJI EEBBE LOO QORAY (MAANSO)

“Allaha Qaadirka ahee
Dhulka qaro u yeelee
Badda qayb ka yeelee
Buuraha qotomiyee
Qodin li’I cirkana dhigay
Xidigaha ku qoraniyo
Dayax kala dhex qaadiyo
Qorraxdiyo cadceediyo
Qaabeeyay dunidee
Quruumaha abuuree
Qawlalada u jeexee
Quudiya dhammaanaw
Qaadiru Mujiibaw
Arjaan kuu qoranayaa
Qabuul nooga yeel duco
Naga qabo Karoonaha,

Allaha Qaadirka ahee
Quwad iyo awoodiyo
Qasnad aan dhammaaniyo
Qaninimo u sugantaw
Qani iyo rasaaqaw
Qawi iyo jabbaaraw
Qaadiru Mujiibaw
Arjaan kuu qoranayaa
Qabuul nooga yeel duco
Naga qabo Karoonaha,

Allaha Qaadirka ahee
Qofka uu abuuriyo
Qudhaanjada kol ay tahay
Risiqooda qorayee
Malaaiig u qaybshee
Qalbi daalacanayee
Qanigiyo faqiirkiyo
Qaladkiyo dunuubtiyo
Qumanaanta camalkiyo
Muuminka iyo qayrkii
Qasdigooda maantiyo
Qaybkaba  arkaayaw
Qafaar iyo ladiifaw
Qudduus iyo wahaabaw
Qaabidu Raxmaanaw
Qayuum iyo jaliilaw
Qaadiru Mujiibaw
Arjaan kuu qoranayaa
Qabuul nooga yeel duco
Naga qabo Karoonaha,

Allaha Qaadirka ahee
Quraysh gaaladeedii
Dhagartay qorsheeyeen
Qabarkooda joogee
Qaawiyay sirtoodii
Qumanaha u digayaw
Colkii ay u qaybsheen
Iyagoo qudh iyo maan
Qolqolkiisa wada tuban
Qaflad  baas ku ridayee
Nabigii ka qariyee (SCW)
Intuu ciid ku wada qubay
Qaaru Tawra saaraw
Qaadiru Mujiibaw
Arjaan kuu qoranayaa
Qabuul nooga yeel duco
Naga qabo Karoonaha,

Allaha Qaadirka ahee
Qabweyni iyo qoortaag
Markuu qiimo sheegtay
Qaninimo ku faanay
Iyo maal qabeenimo
Kibir qooqu lumiyay
Qardoofo iyo eedayn
Gaalnimada qaayibay
Allihii qatalayee
Nabigii quweeyee (CS)
Ducadiisii qaatee
Arlada u qalqaashee
Qaaruun ku dumiyee
Dhulka qayb la gooyee
Qallad baas ku ridayaw
Qaadiru Mujiibaw
Arjaan kuu qoranayaa
Qabuul nooga yeel duco
Naga qabo Karoonaha,

Qoomkii fircooniyo
Qareenkiisi haamaan
Markay qaadan waayeen
Xaqqii loogu qayliyay
Ushii Muuse qaatay (CS)
Qiyaamaday lahaayeen
Mucjisada Alle u qoray
Kaga qaalib yeeloow
Markay qaadan waayeen
Duufaanno qaadiyo
Ayax qariya ciddiyo
Raho qaylinaayiyo
Qaar xula jidhkoodo
Ka qaniina oogada
Cunnadoo qayirantaba
Imtaxaanno loo qoray
Markay qaadan waayeen
Qoom ay ahaayeen
Allihii qarqoonshee
Badda kaga qudh gooyow
Muusana quweeyee (CS)
Qalcad subax ka bixiyaw
Qaadiru Mujiibaw
Arjaan kuu qoranayaa
Qabuul nooga yeel duco
Naga qabo Karoonaha,

Allaha Qaadirka ahee
Dhulka oo qalalay bari
Qoryoobeen dhir iyo geed
Qarjaf xoola waayeen
Ishuna aanay qabanayn
Abaar qabatay noolaha
Biyuu qaaliyoobeen
Qirinqiir dadkuna galay
Allaha Qaadirka ahee
Soo qabooja beeshee
Xareed lagu qasaashee
Raxmadiisu qoysoow
Qaadiru Mujiibaw
Arjaan kuu qoranayaa
Qabuul nooga yeel duco
Naga qabo Karoonaha,

Allaha Qaadirka ahee
Aan qirayo tiisaw
Qadarkaaga weeyee
Qaaradaha adduunyadu
Cudurkay ka qaylyeen
Qalaqiyo cabsida baday
Qaramada la kala xidhay
Qaar loogu daw galay
Lagu daray qabuuraha
Qaar kale u liitaan
Duri ooman naga qabo
Qurbaha iyo gudahaba
Dadkayaga ha qaadsiin
Allahayaw qunuudiyo
Dikrigiyo Qur’aankiyo
Qiyaamkiyo salaadiyo
Arjigaan Allaw qoray
Qabuul nooga yeel duco
Naga qabo Karoona
Rabbaw Qaranka noo dhawr
Tawxiidka lagu qoray
Naga qabo Karoona
Qaramada Islaamkiyo
Qaaradda Afrikaadiyo
Adaa qaban karaayee
Allaha Qaadirka ahaw
Ka dulqaad adduunkana.”

Allaha Qaadirka ahee
Danbiyada qorayee
Malaaiig u qaybshaw
Khaladaadka aadmiga
Dulmiga iyo qoomaha
Waxa qoomam kala galay
Qofafkiyo nafaha kale
Qabarada ogsoonoow
Qafuur iyo raxiimaw
Allaha Qaadirka ahee
Qofkuu oofsanaayiyo
Kala qayriyay mawdkaw
Allaha Qaadirka ahee
Qiiyaamaha ridaayee
Ballanteeda qaadaw
Qaadiru Mujiibaw
Arjaan kuu qoranayaa
Qabuul nooga yeel duco
Cudurkay ka qaylyeen
Naga qabo Karoona
Qarankayga kuma dhaco
Bisinkaan qabsanayaa
Qaadirbaan cuskanayaa
Cid kale uma qayshado
Quudi  maayo qayrkay
Qaramada Midoobay
Waxba yaanay noo qaban
Qayla dhaanna uma diro
Qaadirbaa igaga filan
Arji Eebbe loo qoray
Allahayaw ha nagu qadin
Qabuul ducada noo yeel
Qarankayga kuma dhaco,” INSHA ALLAH.

INSHA ALLAH.

Abwaan Xasan Axmed Yuusuf (Xasan Afgaab)
Tell: 063 4081527 hassanafgaab@gmail.com
Hargeysa, Jamhuuriyadda Somaliland