Hargeysa (SL.Post) Wasiirka warfaafinta Somaliland Cismaan Cabdilaahi Saxardiid (Cadaani), ayaa sheegay inuu si rasmi ah u furmay wadahadaladii u dhexeeyay wefti ka socday Xukuumadda iyo xubno ka tirsan Khaatumo.
Wasiir Cadaani oo shir jaraa’id ku qabtay xafiiskiisa waxa kale oo uu sheegay inay wadahadalkani ku yimi ka dib markii hogaamiyaha Khaatumo aqbalay gogol nabadeed Madaxweynaha Somaliland u fidiyay bulshada degta bariga Somaliland gaar ahaan Sool iyo Buuhoodle.
“Madaxweynaha Somaliland Axmed Maxamed Siilaanyo wuxuu wadahadaladan u saaray guddi qaran oo ka kooban Wasiirro iyo madaxdhaqameed, go’aanka uu qaatay Dr. Cali Khaliif Galaydh oo ah mid geesinimo ku dheehan tahay, waanu soo dhaweynaynaa haddaanu nahay Xukuumadda Somaliland waanan ku bogaadinaynaa inay garteen isaga iyo saaxiibadiiba inay dadkiisu yihiin dad reer Somaliland ah. Waligoodna ay ahaayeen dad reer Somaliland maantana ay yihiin oo berito iyo caalamkani inta uu jiro ay yihiin dad reer Somaliland ah.” ayuu yidhi Wasiirka warfaafinta Somaliland Cismaan Cadaani
Wasiirku waxa uu intaas ku daray “Ummaddan wada dhalatay ee xigaalka ah ee isku Abtiga ah, ee xididka ah ee wada nool oo dantooduna ay ku jirto wada noolaashaha iyo nabadda, wadahadaladani waxay daba joogaan gogoshii Madaxweynaha Somaliland uu u fidiyay Dhulbahante weyne ayna ka jawaabeen beelaha Dhulbahante oo ay ka mid yihiin beelaha Maxamuud Garaad, shirarkii ka dhacay deegaanka Awr-goobays iyo shirkii ka dhacay Adhic-cadeeye ee Maxamuud Garaad ay kaga jawaabeen gogoshii kuna aqbaleen. Inay Somaliland ka mid yihiin waxna la qaybsanayaan.” ayuu yidhi Wasiir Cadaani
Wasiirka Warfaafinta Somaliland waxa uu sheegay in Madaxweynaha Somaliland mawqifkiisu yahay sidii ay Somaliland u midoobi lahayd, waxaanu yidhi “Waxa Madaxweynaha Somaliland iyo Xukuumaddiisa ka go’an in qarankani uu ahaado mid is haysta oo aan kala qob-qobnayn, maadaama oo ay dad wada dhashay yihiin oo dhaqan, wadanoolaasho, xididnimo iyo saaxiibtinimo intaba ay ka dhaxayso uu noqdo INSHA ALLAH. Madaxweynaha Somaliland marka uu xilkiisu dhamaado dal is haysta oo mid ah inuu ka tago.”
Halkan ka daawo.
Somalilandpost.Hargeysa