Hargeysa (SLpost)- Madaxweynaha Jamhuuriyadda Somaliland Md Muuse Biixi Cabdi iyo weftigii uu hogaaminayey ayaa dalka dib ugu soo laabtay, iyaga oo ka soo gudbay xudduudka magaalada Lawyo-caddo ee ay wadaagaan dalka Jabuuti oo labadii maalmood ee u dambeeyey madaxweynuhu ku sugnaa..
Madaxweynaha Somaliland iyo weftigiisa waxa dhinaca dalka Jabuuti ka soo galbiyey xubno ka tirsan Golaha wasiirrada oo uu weheliyo taliyaha guud ee ciidanka booliska Jabuuti oo weftiga u soo gudbay dhinaca Somaliland.
Taliyaha guud ee ciidanka booliska Jabuuti oo halkaas ka hadlay, ayaa sheegay in isu socodka xadka labada waddan uu furan yahay, wuxuuna xusay in ay aad ugu faraxsan yihiin dhankooda isu socodka labada dhinac.
Madaxweyne Biixi markii uu u soo gudbiyey dhinaca dalka waxa halkaas ku soo dhaweeyey xubno ka tirsan golaha wasiirrada, taliyeyaasha ciidamada qaarkood, maamulka gobolka Salel, ka degmada Saylac, madax-dhaqameed, Haween, dhallinyaro iyo bulshada qaybaheeda kala duwan oo ruxayey calanka Somaliland iyo caleemo qoyan wuxuuna madaweynuhu salaan sharaf ka qaatay curub ka tirsan ciidanka Somaliland.
Madaxweynaha Jamhuuriyadda Somaliland Mudane Muuse Biixi Cabdi, oo meel fagaare ah kala hadlay dadweynihii soo dhaweeyey ayaa u sheegay in ay madaxweyaha Jabuuti Mudane Ismaaciil Cumar Geelle, ka wada hadleen xidhiidhka labada dal iyo sidii ay iskaga kaashan lahaayeen arrimo ay ka mid ahaayeen dhaqaalaha, ganacsiga, amniga iyo isu socodka labada bulsho ee labada dal.
Madaxweynaha Jamhuuriyadda Somaliland Muuse Biixi Cabdi, waxa kale oo uu cadeeyey in ay go’aan ka wada gaadheen dhigiisa Jabuuti Ismaaciil Cumar Geelle, in si rasmi ah loo furo isu socodka labada bulsho ee iskaga gudbaya xudduuda ay wadaagaan labada dal, oo wakhtigaas uu madaxweynuhu la hadlayey dadweynaha soo dhaweynayey si rasmi ah loo furay.
Madaxweyne Biixi waxa uu warbixin ka dhageystay masuuliyiinta wasaaradda Gaadiidka iyo horumarinta jidadka iyo hay’adda waddooyinka ee Somaliland oo gacanta ku haya waddada isku xidhi doonta Boorama iyo Lawyo-caddo, oo uu kula dardaarmay in ay ku dhakhsadaan dhameystirka waddadaas.
Madaxweynaha iyo weftigiisa ayaa safarkooda shaqo ku soo mari doona gobollada galbeedka Somaliland, iyaga oo u kuurgali doona xaalada guud ee ay ku sugan yihiin dadka iyo duunyaduba, kulamo kala duwanna la yeelan doona mas’uuliyiinta deegaannadaas ay safarka ku marayaan.
Xuduudka u dhexeeya Somaliland iyo Djibouti ayaa xidhnaa ilaa bishii March ee sannadkan 2020, kaddib markii uu isu-socodka labada waddan uu saamayn ku yeeshay caabuqa Coronavirus. Amarka lagu xidhay xuduudka labada waddan oo ka yimi dhinaca dowladda Jabuuti, ayaa ka dhashay kaddib markii sida la sheegay caabuqa Coronavirus laga helay tobannaan qof oo ka tagay dhinaca Somaliland.
Somalilandpost.net
contacT@somalilandpost.net
