Hargeysa (SLpost)- Brendon J. Cannon oo ah macalin wax ka dhiga Jaamacadda Khalifa ee magaalada Abu Dhabi, ayaa booqasho taariikhi ah ku tilmaamay socdaal 12-kii bishan Somaliland uu ku yimi Taliyaha Hawl-galka Ciidamada Afrika ee Maraykanka Stephen Townsend.
Taliyaha Hawl-galka Ciidamada Afrika ee Maraykanka Stephen Townsend oo socdaalkiisa ay ku wehelinayeen Saraakiil ka tirsan Aqalka Gaashaandhigga iyo Safiirka Maraykanka, waxa qaabilay madaxweynaha Somaliland Md Muuse Biixi Cabdi, kahor intii aanay booqasho indho-indhayn ah u tagin garoonka diyaaradaha iyo dekedda Berbera.
Madaxweynaha Somaliland oo ka hadlay ujeeddada socdaalka weftiga Maraykanka iyo natiijada kulanka Dhexmaray, ayaa sheegay inay ka wada-hadleen xoojinta xidhiidhka iyo iskaashiga dhinaca Ammaanka ee labada waddan.
Khabiir Brendon Cannon oo sidoo kale ah khabiir ka faallooda siyaasadda Geeska Afrika, waxa uu sheegay in ujeeddada socdaalka Taliyaha Ciidamada Maraykanku la xidhiidhay indho-indhayn uu ku samaynayo Garoonka diyaaradaha ee Berbera maadaama Maraykanku danaynayo inuu saldhig Milatari ka samaysto Somaliland.
“Tani waxay ahayd booqasho taariikhi ah. Taliyuhu wuxuu booqasho ku tagay Jamhuuriyadda Somaliland si uu u qiimeeyo Garoonka iyio Madaarka Berbera haddii xaalad deg-deg ahi timaaddo,” sidaas ayuu yidhi Brendon oo qoraal uu arrintan kaga hadlayo ku baahiyey bartiisa Twitter-ka maanta.
War-murtiyeed ka soo baxay Taliska Ciidamada Marayanka ee Afrika, ayaa lagu sheegay wax lagu tilmaamay siyaasadda Maraykanka ee midnimada Soomaaliya.
Khabiirkan oo daba-socda war-saxaafadeedka Taliska Milatariga Maraykanka iyo saamaynta uu yeeshay, waxa uu sheegay inaan lagu mashquulin siyaasadda Maraykanka ee midnimada Soomaaliya oo xusay inaanay taageero badan ka haysan dowladda Maraykanka.
“Ha Ku Sirmin siyaasadda Maraykanka ee ‘Soomaaliya oo mid ah’ oo taageeradeedu ka sii gudhayso Washington”, sidaas ayuu yidhi Brendon Cannon.
Isbahaysiga Reer Galbeedka ee Maraykanku hoggaamiyo oo cabsi xooggan ka qaba saamaynta uu Shiinuhu ku leeyahay gobolka Geeska Afrika, ayaa danaynaya inuu saldhig Milatari ka samaysto Garoonka diyaaradaha ee Berbera oo dib-u-casriyeyn lagu sameeyey.
Xiisaha Maraykanku u qabo saldhig Milatari oo uu ka samaysto garoonka diyaaradaha ee Berbera, ayaa sababtay in dowladda Maraykanku marti-qaad u fidisay madaxweynaha Somaliland Md Muuse Biixi Cabdi iyo wefti uu hoggaaminayo oo badhtamaha bishii March ee sannadkan socdaal ku tagay magaalada Washington ee Xarunta dalka Maraykanka, waxaanu weftigu kulamo kala duwan la qaatay Saraakiil ka tirsan Wasaaradda Gaashaan-dhigga iyo Xildhibaanno ka tirsan Aqalka Congress-ka Maraykanka, waxaanay labada dowladood kala saxeexdeen heshiisyo iskaashi oo dhexmara labada waddan.
Somalilandpost.net
contact@somalilandpost.net
