Hargeysa (SLpost)- Xukuumadda Somaliland ayaa ka hadashay isku-day Dil uu toddobaadkan ka badbaaday madaxweynihii hore ee Maraykanka ahna murashaxa madaxweyne ee xisbiga Jamhuuriga Donald Trump.
Murashaxa Madaxweynaha Xisbiga Jamhuuriga ayaa dhaawac ka soo gaadhay dhegta Midig kaddib markii lala beegsaday Xabbad uu riday nin dhalinyaro ah Sabtidii toddobaadkan xilligaas oo uu khudbad u jeedinayey taageerayaasha xisbiga Jamhuuriga.
Wasaaradda Arrimaha Dibadda ee Jamhuuriyadda Somaliland oo dhacdadan kaga hadashay qoraal kooban oo lagu baahiyey barta twitter-ka (X), waxa ay ku sheegtay inay shacabka iyo Dowladda Somaliland barbar taagan yihiin shacabka Maraykanka.
“Annagoo ku hadlayna magaca Jamhuuriyadda Somaliland, waxaanu muujinaynaa walaaca aanu ka qabno isku daygii dilka ahaa ee dhawaan lala beegsaday Madaxweynihii hore ee dalka Maraykanka Donald Trump. Maadaama oo aanu nahay Qaran ku dhisan Qiyamka Dimuqraadiyadda, waxaanu garab-taaganahay shacabka Mareykanka xilligan adag ee ay ku jiraan.
Waxaanu kalsoonni ku qabnaa inay Maraykanka u qabsoomi doonto doorasho nidaamsan oo ka tarjumaysa bisaylka hay’adahooda dimuqraadiga ah,” sidaas ayaa lagu Sheegay war-saxaafadeedka Wasaaradda Arrimaha Dibadda.
Gebogabadii waxa ay Wasaaradda Arrimaha Dibaddu beesha Caalamka u xaqiijisay sida ay Somaliland uga go’antahay nabad-geliyada gobolka iyo u hoggaansanaanta mabaa’diida dimuqriyaadiga ah isla markaana ay taageersan tahay nidaamka dimuqraadiyeed ee Caalamka.
On behalf of the Republic of Somaliland, we express our profound concern regarding the recent assassination attempt on former President Donald Trump. As a nation committed to democratic values, we stand in solidarity with the American people during this challenging time. (1/2) pic.twitter.com/pKO0rAY2aZ
— MFA Somaliland (@somalilandmfa) July 15, 2024