Hargeysa (SLpost)- Xukuumadda Madaxweyne Siilaanyo, ayaa markii u horreysay si faahfaahsan u soo bandhigtay qorsheyaal siyaasadeed oo ay ku wejahayso qaabaynta Ganacsiga Somaliland la leedahay waddamada Jaarka ah iyo kala-xadaynta noocyada Ganacsi ee Gudaha Dalka, kuwaas oo shacbiga iyo ganacsatada dalku cabashooyin xooggan ka muujiyeen.
Wasiirka Ganacsiga iyo Maal-gashiga Caalamiga ah ee Somaliland Dr Maxamed Cabdilaahi Cumar oo maanta xilka wasaaradda Arrimaha Debedda ku-wareejinaya Wasiirka Cusub ee Wasaaraddaas Md Maxamed Biixi Yoonis, ayaa Waraysi Gaar ah kaga xog-warramay Qorsheyaashiisa siyaasadeed ee uu ku wejahayo caqabado uu ka garaabay oo Horyaalla wasaaradda Ganacsiga, kuwaas oo uu sheegay inay wakhtigan ku hawlan yihiin dib-u-qiimayn iyo daraasado ay xal ugu raadinayaan.
Dr Maxamed Cabdilaahi oo aanu ugu horreyn weydiinnay qorsheyaasha uga yaalla kala-xayn la’aanta Ganacsiga Dalka, waxa uu ku jawaabay, “Waxa ay tahay arrimaha muhiimadda koowaad iigu jira ee bartilmaameedka u ah siyaasadda ku wejahan xagga ganacsiga iyo maal-gashiga oo aan doonayo inaan ku hoggaamiyo wasaaradda Ganacsiga iyo Maal-gashiga Caalamiga ah. Laakiin immika waxa ii socda daraasad, ka-fiirsasho iyo dib-u-qiimayn guud ahaan ganacsiga dalka iyo ka dibadda aan la leenahay oo aan imika ku samaynayo,” ayuu yidhi.
Wasiirka Ganacsiga Somaliland oo aanu weydiinnay Qorsheyahaas uga yaalla xidhiidhka Ganacsi ee waddamada Jaarka ah iyo isu-dheellitirnaan la’aan noocyada Ganacsiga ee Somaliland la leedahay waddamadaas, waxa uu sheegay inay qorsheynayaan dejinta shuruuc iyo siyaasad horseed u noqda ganacsi si siman looga faa’idaysto. “Waxyaabaha aan muhiimadda siinayo waxa ka mid ah xidhiidhka ganacsi ee aynu leenahay waddamada jaarka ah hadday Itoobiya tahay, hadday Jabuuti tahay inaanu qaabayno oo shuruuc uu ku dhisnaado, oo uu heshiisyo laysla oggol yahay ku dhisnaado, inuu ku dhisnaado wax wadaag geesaha ganacsigu dhexmarayo ay si isku mid ah uga faa’idaan ganacsiga iyo is-dhex-galka,” ayuu yidhi Dr Maxamed Cabdilaahi, waxaanu intaas raaciyey, “Waxa ka mid ah waxyaabaha bartilmaameedka ii ah maal-gashiga caalamiga ah iyo shirkadaha doonaya inay dalkeena maal-gashadaan dhinacuu doono ha noqdo dhinacay xiisanaynayaan.”
Dr Maxamed Cabdilaahi waxa uu sheegay inay wasaarad ahaan ka hawl-galayaan sidii loo kala xadayn lahaa Ganacsiga dalka si loogu siinnaado kheyraadka iyo dhaqaalaha dalka, “Waxaanu ka hawl-galaynayaa kala xadaynta Ganacsiga ee dalka oo ka soo dhoofiya, ka soo dejiya iyo ka dukaamada leh ee iibinaya aanay qof kaliya wada-noqon ee la wadaago kheyraadkii dalka iyo fursadaha ganacsi iyo dhaqaale ee dalka ka jira,” ayuu yidhi Dr Maxamed Cabdilaahi, “Iyo Arrinta kale oo ah Shuruuc dalkani leeyahay oo kala xadaynta maal-gashiga iyo dhaqaalaha lagu maamulo. Dhowrkaa arrimood ayaanu is leenahay way u baahan yihiin in wasaaradda Ganacsiga iyo maal-gashiga Caalamiga ah inaanu xoogga saarno.”
Wasiirka Ganacsiga Somaliland Dr Maxamed Cabdilaahi Cumar oo ka jawaabayey su’aal nuxurkeedu ahaa siyaasadda ay ku wejahayaan isu-dheellitirnaan la’aanta Ganacsiga Somaliland la leedahay waddamada jaarka, gaar ahaan dalka Itoobiya, waxa uu yidhi, “Arrintaas waxa lagaga hawl-galayaa in la helo heshiisyo iyo Ganacsiyo isu-dheelli-tiran oo labada dal iyo laba shacbiba ay dani ugu jirto.”
Waa markii horreysay ee Xukuumadda Somaliland si waafi ah ku soo bandhigto siyaasad lagu wejaho Qaabaynta Ganacsiga aan xadka lahayn ee dalka Gudihiisa iyo isu-dheelli tirnaan la’aanta badeecadaha ganacsi ee ay is-dhaafsadaan Somaliland waddamada Jiiraanka ahi, waxaanay noqonaysaa tallaabo shacbigu iyo ganacsatada dalkuba soo dhawaynayaan haddii xukuumaddu kaga dhabayso hirgelinteeda.
XIGASHO: Ogaal
