Hargeysa (SLpost) -Xildhibaan Ibraahim Axmed Raygal oo ka mid ah Mudanayaasha Golaha Wakiiladda Somaliland, ayaa sheegay In siyaasadda dibaddu ay horumar gaadhay islamarkaana sheegay in Xukuumadda KULMIYE kor u qaadday siyaasada arrimaha dibadda, hase yeeshee waxa uu ku dooday in aanu jeclayn in Turkigu sii wado marti-gelinta wada hadallada u dhaxeeya Somaliland iyo Soomaaliya.
Xildhibaan Raygal waxa uu sidaasi ku sheegay waraysi uu siiyay wargeyska Dawan. Waxa kale oo uu kaga hadlay xeerkii doorashadda aqalka wakiiladda iyo kala xadaynta degmooyinka Somaliland.
“Waxaan u arkaa intii dawladda KULMIYE ay dalka ka talinaysay in siyaasadda arrimaha dibaddu kortay, waxaanan ku caddaynayaa, Waa markii ugu horaysay ee calanka Somaliland iyo calanka Somalia la is garab sudhay meel caalami ah oo 50 dawladood markhaati ka yihiin laguna qoray qoddobka lixaad ee odhanaya Somaliland iyo T.F.G ama cidii bedasha T.F.G waa inay xidhiidhkooda mustaqbalka wada hadlaan beesha caalamkuna gacan ku siiso, taasi waxay sheegaysaa inay tahay laba dal ayaad tihiin ee wada hadla taana waxa la keenay intii xukuumadda KULMIYE ee Madaxweyne Siilaanyo Somaliland hoggaaminaysay,”Ayuu yidhi Xildhibaanku.
Xildhibaanku waxa uu sheegay in uu ka soo horjeedo in dawlada Turkigu ay sii wadaan wada hadalladda u dhaxeeya Somaliland iyo Soomaaliya, waxaanu yidhi “Anigu waan ka soo hor-jeedaa in Turkigu dhex-dhexaadiyo wada hadallada Somaliland iyo Soomaaliya. sababta aan uga soo horjeedaana waxa weeye aniga Turkiga uma arko dhexdhexaad. Waxaan qabaa in dal kale oo dhex-dhexaad ah loo wareejiyo wada-hadalladda.”
Xildhibaan Raygal waxa uu sheegay in cidda kaliya ee sharcigu u ogol yahay inay Somaliland ku matasho wada hadalladu ay tahay xukuumadda, hase yeeshee waxa uu ku dooday in madax-dhaqameedkuna tallo ku leeyihiin iyagoo aan warbaahinta ka hadlaynin.
Xildhibaanku waxa uu sheegay in kala xadaynta gobollada iyo degmooyinka ay noqonayso xadkii uu Ingiirku ka tagay, waxaanu yidhi “Dastuurkeenna haddii aad dib ugu noqoto iyo xeerka 23 ee lagu maamulo gobollada iyo degmooyinka dalka, waxa ku qoran xeerkaa waa xadkii Ingiriis u dhigay ee uu u kala sameeyay 6-dii degmo ee uu sameeyay boqol sanno ka hor, ka dibna 5 ka mid gobolo noqotay laakiin innagu u aragno 6 gobol oo sax ah.Lixdaa gobol markay degmooyinka ahaayeen mid walba xadkeedu meel ayuu joogay. Markaa xeerkani waxa uu qorayaa xuduudaha degmooyinku waa kii lixdankii.”
Xildhibaan Ibraahim Axmed Raygal, waxa uu xusay inay Gole ahaan rejaynayaan inay ansixiyaan xeerkii lagu soo dooran lahaa Golahooda, waxaanu yidhi “Xeerkii doorashada Golaha Wakiilada wuu na horyaalaa oo ajandaha ayuu ku jiraa in aanu dhammastirnana waanu rejaynaynaa. daacadna waanu ka nahay in xeerkaa doorashadda wakiiladda meel marino wakhti badan ayaan fadhinay oo toban sannadood ah umadda jaaniska waa u banaynaynaa.”
Xigasho- Dawan
