Hargeysa (SLpost)- Xubno ka kooban dhalinyaro Aqoonyahan ah oo deggen magaalada Hargeysa, ayaa bayaan taageero ah oo soo saareen ku majeertay go’aan ay madax-dhaqameed iyo wax-garad ka tirsan gobollada Awdal iyo Salal kaga soo horjeesteen dhawaaqyada qabyaaladaysan ee mucaaradku taageerada kaga raadinayaan shacabka.
Bayaanka taageerada ah ee dhalinyarada oo nuqul ka mid ah soo gaadhay xafiiska Somalilandpost ee Hargeysa, isla markaana ay ku saxeexan yihiin magacyada dhalinyarada soo saartay, ayaa u qornaa sidan; “Annaga oo ka mid ah Dhalinyarada Deggan Caasimada Somaliland ee Hargeysa waxaanu si kal iyo laab ah u soo Dhowaynaynaa,uguna Bogaadinaynaa, salaadiinta, cuqaasha iyo wax-garadka gobolada galbeedka Somaliland ,baaqa ay u soo jeediyeen Xisbiyada iyo Siyaasiyiinta Mucaaradka,oo Beryahan Danbe Caddaystay Sidii ay shacabka walaalaha ah ee Imika uun ka soo Kabanaya Burburkii iyo Rafaadkii ay kaga tageen Raadadkii Dagaaladu,ugu dhex tuuri lahaayeen Tafaraaruq iyo Qabyaalad,aynu ognahay,inaan laga dhaxlin wax aan ka ahayn kala tag iyo burbur.
Waxa wax lala yaabo ah in Rag Siyaasiyiin ah oo Dalkan ka quud-daraynaya Mustaqbal Siyaasadeed Inay Maalin Kastaba Halgan ugu jiraan,una Tafaxaydan Yihiin,sidii ay Xadhigii la Xidhaba u kala furi lahaayeen,shalay bay ahayd markii dadkan tafaraaruqii ku dhacay,odayaasheennu ilaahay uun ku Garabgalay ee dirqi iyo tuxun laysugu soo jiiday,ee laysugu keenay,kuwa Siyaasiyiinta sheeganaya ee maanta oo lagu tallo jiro in halka aynu maraynno ee nabad-gelyada iyo Horumarka ALLE innagu Galladay,in hore looga sii socdo,doonaya inay durbaan olole qabyaaladeed dadka u tumaan.
Waxaanu leenahay Adeer MAGAADAYN,XABUUSHAYN IYO KUUL CARRAYNI toonna dadku aqbali Maayaaane’ ha ku toobbad seegina’e, sheeko kale, malaa inaad uga wareegtaan,ayaad ficilkan gurracan Iyo fidnadan idiin dhaami lahayd.
Midna ogaada,waar nimanyow madax-tinimadu sideedaba qarja-jac iyo fidmo abuur kuma timaado’e,
Waa hibo ka timaada xagga rabi,hadday kuu qoran tahay waad heli haddaanay kuu qorayna inaad hesho Ha sugin,in lagu doonana maaha madax-tinimo,habdhaqan iyo afcaal horseedda qaran jab,iyo god-Dalooladeena oo cadawga loo muujiyo.
Waxaannu duco iyo mahadba halkan uga diraynnaa madaxdhaqameedka is xilqaamay ee had iyo jeer Nabadda iyo deganaanshaha ka shaqeeya,waxaanu si gaara u bogaadinaynnaa madax-dhaqameedka Gobolada galbeed,ee ka adkaysan waayey,inay dareenkooda ka muujiyaan hantaaqada loo Geysanayo,amniga nabadda iyo wada noolaanshaha shacabka.
Magacyada Dhalinyarada bayaanka diraysa: Cabdi Muxumad Axmed, Maxamed Axmed Sahal, Jaamac Xirsi Rooble, Cabdi Siciid Saleebaan, Axmed Diiriye Maxamuud, Jaamac Yusuf Claaahi.”
