Hargeysa (SLpost)- Ururka Suxufiyiinta Somaliland ee SOLJA, ayaa cambaareeyey xadhigga Wariye Maxamed Aadan Dirir oo muddo saddex maalmood ah ku xidhan Saldhigga booliska ee magaalada Caynaba, iyada oo ilaa hadda aan Maxkamad ah la horgeyn.
Warsaaxafadeed uu ku saxeexan yahay Xoghaya Guud ee Ururka Suxufiyiinta Somaliland ee SOLJA Maxamed-Rashiid Muxumed Faarax, oo lagu cambaareeyey xadhigga Wariyehaas, ayaa u dhignaa sidan: “Ururka Suxufiyiinta Somaliland ee SOLJA wuxuu canbaaraynayaa xadhiga weriye maxamed aadan dirir oo doraad 12-kii duhurnimo si sharci daro ah loogu xidhay magaalada caynabo isagoo aan loo marin sifihii sharcigu u jidaynayay qabashadiisa oo aan wax waaran ah maxkamadi usoo goynin.
Iyadoo sida uu noo cadeeyay mar aanu xalay la xidhiidhnay gudoomiyaha maxkamda caynabo lagu eedeeyay inuu jeelka caynabo xoog ku galay intuu askartii jiidhay oo uu sawiro kasoo qaaday nin ku eedaysnaa kufsi isla markaana uu warkaasi ku baahiyay shabakada wararka ee caynaba news’
Arrintaas oo ururka SOLJA u arko inaanay macquul ahayn in weriye aan qori sidani xoog ku gali karo jeel askari ilaalinayso sidaa daraadeed ururka solja wuxuu ka codsanayaa maamulka caynabo iyo xukuumada sare ee Somaliland inay xoriyadiisa sida ugu dhakhsaha badan ugu soo celiyaan haddii ama degdeg loo horkeeno maxkamad.”
ALLAA MAHAD LEH
M.RASHIID MUXUMED FARAX
XOGHAYAHA GUUD EE URURKA SUXUFIYIINTA SOMALILAND EE
SOLJA