Berbera (SLpost)- Badhasaabka Gobolka Saaxil Fahmi Cabdi Bidaar, ayaa maanta Kulan Ballaadhan la Yeeshay guddoomiyaasha degmooyinka uu ka kooban yahay gobolka Saaxil, waxaana kulankaas lagu lafo-guray xaaladdaha nabad-gelyada iyo horumarka dhinacyada Arrimaha bulshada.
Kulanka oo ku qabsoomay xarunta Maamulka gobolka Saaxil, waxa ka qayb-galay badhasaabka gobolka oo uu wehelinayey guddoomiye ku-xigeenka gobolka Saaxil Khadar Cali Faarax, Xoghayaha gobolka Ibraahim Oogle Cilmi, Guddoomiye ku-xigeenka degmada Berbera Yacquub Xuseen iyo guddoomiyeyaasha degmooyinka Mandheera, Laasciidle, Go’da Weyn, Sheekh, Xagal, Laaso-dacawo iyo Bullaxaar.
Kulankaas ayaa lagu lafa-guray baahiyaha ka jira degmooyika hoos-yimaada gobolka Saaxil iyada oo lagu kuur-galayay hawlaha amniga iyo adeegyada bulshada ee dhinacyada biyaha, caafimaadka, iyo waxbarashada.
Badhasaabka gobolka Saaxil Fahmi Cabdi Bidaar oo kulankaas ka hadlay, ayaa war-bixinno kala duwan ka dhegaystay masuuliyiinta uu kulanka la qaatay, waxaanu dhiirri-geliyey sidii ay uga wada-shaqayn lahaayeen horumarin tabaahiyaha aasaasigaa.
Badhasaabka gobalka Saaxil Fahmi Cabdi Bidaar, waxa uu faray maamulka degmooyinka in wax-tarka iyo horumarinta xukuumadda dhexe ku taageerayso horumarinta adeegyada bulshada ay ku xidhnaan doonto lagu qiimayn doono heerka dakhliga ay soo saarto.
Waxa kale oo badhasaabku halkaas ka sheegay inay maamul ahaan muddo tabobar aqoon-korodhsi ah oo soconaya afar maalmood u furi doonaan Xoghayeyaasha degmooyinka, taas oo uu xusay inay qayb laxaad leh ka qaadan doonto dhinaca dakhli-ururinta.
Kulankaas waxa hadallo ka jeediyey Gudoomiyha Degmada Xagal, Yuusuf Axmed Maxamed, gudoomiye ku xigeenka degmadaas Cabdiraxmaan Muuse Ciise, Xoghayaha Degmada Xagal Maxamed Cabdi Haaruun, Guddoomiyaha degmada Mandheera Yaasiin Dhamac, gudoomiye ku Xigeenka Degmada Mandheera Aar Qaadi Jaamac, Xoghayaha Degmada Mandheera Cabdiraxmaan Muuse Cilmi, Xoghaya Degmada Laas-Ciidle Cabdiraxmaan Yuusuf Xasan, Gudoomiyha Degmada Go’da Wayn Cabdilaahi Cabdi Cali, Gudoomiye ku xigeenka degmadaas Cabdi Geedi Xoghayha Degmada Goda Wayn Deeq Cabdi Warsame, Xoghayaha Degmada Sheekh Cali Dheere, Gudoomiyaha Degmada Laasa-dacawo Muuse Yaasiin Axmed, Gudoomiye ku Xigeenka Degmada Laaso-Dacawo Maxamed Ismaaciil Jaamac, Gudoomiyaha Degmada Bulaxaar Maxamuud Qawdhan Ayax, Gudoomiye Ku Xigeenka Degmada Bulaxaar Maxamed Xasan Muuse.
Waxaanay dhammaantood masuuliyiintaasi war-bixinta deegaamada ay ka yimaaddeen ku wareejiyey maamulka gobolka Saaxil, ayaa dhammaantood soo qaaday baahiyaad dhinacyo badan oo ka jira deegamada ay ka yimaaddeen.
Kulankan ayaa noqonaya markii u horreysay ee Guddoomiyaha gobolka Saaxil la yeeshay maamulka heer Degmo tan iyo markii madaxweyne Siilaanyo xilka u magacaabay bishan horaanteedii.
Somalilandpost.net
Berbera News Desk
