Washington (SLpost) – Dawladda Soomaaliya, ayaa Shirkad dhinaca Sharciga ah oo fadhigeedu yahay Magaalada Washington ee dalka Maraykanka u kiraysatay inay carqaladayso Xidhiidhka Somaliland iyo Maraykanka.
Dawladda Soomaaliya oo ay Wakiil ka tahay Safaaradda ay ku leeyihiin Maraykanka, ayaa hawl-gelisay Shirkadda dhinaca Sharciga ee loo yaqaano Von Batten-Montague-York.
Shirkaddan oo ay hore Lacago ugu siiyeen kooxda Loo yaqaano ‘Somali Alliance’ oo fadhigoodu yahay Maraykanka, inay ka hor tagto heshiisyadii ay bishii March ee sannadkan wada galeen Somaliland iyo Maraykanka, ayaa hadda bilowday faafinta Warar borobagaando ah, kuwaasi oo wax lagaga sheegayo Madaxda Dawladda Somaliland, waxayna si cad u sheegeen falal ay la damacsan yihiin inay kula kacaan Qaarkood.
Shirkaddan dhinaca Sharciga ah ee u kiraysan Dawladda Soomaaliya, ayaa boggeeda Twitter-ka ku baahisay qoraal ay ku sheegayso inay kala shaqaynayso Aqalka Koongarayska Maraykanka sidii Cuno-qabatayn loogu soo rogi lahaa Taliyaha Booliska Somaliland Maxamed Aadan Saqadhi (Dabagale), kaasi oo ay ku eedeeyeen inuu ku lug lahaa Xadhig iyo Jidh-dil ay xuseen in loo geystay Suxufiyiin iyo dad Rayid ah oo 11-kii bishii hore ee September ka qayb-qaatay Dibed-baxyo dimuqraadiyadeed oo ka dhacay Somaliland, arrintaasi oo sida muuqata ay uga faa’idaysanayaan qorsheyaashooda ah inay dhaawacaan Sumcadda Somaliland dunida ku leedahay, sida Nabadgalyada, Xorriyatul-qawlka iyo xidhiidhka Boolisku la leeyahay Shacabka uu amnigooda masuulka ka yahay.
Batten-Montague-york oo Qareeno ka mid ahi mar walba daba-gal ku sameeyaan dhacdooyinka ka dhaca Somaliland, iyagoo adeegsanaya hadallada ay Masuuliyiinta Xisbiga WADDANI ay Warbaahinta mariyaan, gaar ahaan markay eedaymaha u jeedinayaan Saraakiisha Booliska, ayaa qoraalka ay Maanta ku baahiyeen boggooda Twitter-ka waxay eedaymahan ay caddayn ahaan u soo raaciyeen muuqaal uu ka hadlayo Maxamed Sidiiq Dhamme oo ka mid ah Madaxda Xisbiga WADDANI, taasi oo loo fahmi karo inay ka faa’idaysanayaan khilaafaadka dhinaca doorashada ee xilligan ka taagan Somaliland.
Ugu dambayn, Shirkaddan Von Batten-Montague-york oo Ninka Madaxda ka ahi uu Magaalada Washington kula kulmay Madaxweynaha Soomaaliya Xasan Sheekh Maxamuud, bishii hore markii uu socdaalka ku tagay Maraykanka, ayaa taariikh ahaan marka dib loo raaco ah shirkad aan wax sumcad ah ku lahayn gudaha Maraykanka, waxa la sheegay in Cid kasta oo cid kale shirqoolaysaa ay Kiraysato, sidaa darteed waxa muhiim ah in Dawladda Somaliland qaaddo Tallaabooyin ay kaga hor tagayso fadeexadaha aan sharciga ahayn ee shirkaddaasi muddada dheer ka fidinayso Jamhuuriyadda Somaliland.
Somalilandpost.net
contact@somalilandpost.net
