Hargeysa (SLpost)- Xukuumadda Somaliland ayaa gebi-ahaanba joojisay booqashada loogu tago maxaabiista ku xidhan Xabsiyada dalka sababo la xidhiidha xaaladda xannuunka Covid-19 oo xilligan si xooggan ugu faafaya dalka.
Qoysaska ay ka dhasheen Maxaabiista ku xidhan Jeelashada dalka, ayaa loo oggol yahay inay toddobaadkii maalinta Jimcaha booqasho ugu tagaan maxbuuska ka xidhan si loogu geeyo Raashin iyo nafaqo dheeraad ah si loogu kaabo raashinka xabsiga loogu sameeyo saddexda wakhti oo nafaqo ahaan aan dabooli karin cuntada dheeliga tiran ee jidhka bani’aadamka u baahan yahay.
Wasiirka Wasaaradda Cadaaladda Somaliland Saleebaan Warsame Guuleed, ayaa sheegay in ay joojiyeen dadkii booqashada ku tagi jiray maxaabiista ku jirta 14-ka Xabsi ee ka jira dalka si maxaabiista Jeelasha ku jirta looga xakameeyo faafitaanka safmarka ah Covid-19 oo labadii bilood ee u dambeeyey dad badan soo ritay, qaar kalena ugu geeriyoodeen gobollada dalka.
Waxa uu wasiirku sheegay inay go’aanka lagu joojiyey booqashadada maxaabiista kala kaashanayaan Taliyaha ciidanka asluubta iyo saraakiishiisa is-dhaafintii maxaabiista Xabsiyada dalka, si looga hortago faafitaanka xannuunka Covid-19, isla markaana Xabsi kasta Maxaabiistii ku jirtay uun laga hawl galay sidii loogu filaysiin lahaa.
“Dalku waxaa uu leeyahay 14-jeel oo shaqeeya, maxaabiis tiro badan ayaa ku jirta, ciidamada laf ahaantoodu gacanta ayay ku hayaan, markii uu xannuunka iyo cabsidiisii soo laba kaclaysay, annaga oo iskaashanayna taliyaha iyo saraakiisha kala duwan ee ciidanka asluubta talaabooyin badan ayaanu qaadnay.
waxaa aanu joojinay dhammaan booqashooyinkii loogu tagi jiray maxaabiista, sababta oo ah dadka maxaabiista booqanaya waxaa ay ka yimaaddaan gobollada dalka iyo meelo kale oo kala duwan, dhammaan waxaa aanu joojinay booqashooyinkii sidaas oo kale ahaa,” Sidaas ayuu yidhi Wasiirka Caddaaladda oo maanta la hadlay warbaahinta qaarkeed.
Wasiirku waxaa uu sheegay in ay u direen kooxo caafimaad oo baadha bad-qabka Maxaabiista ku xidhan Jeelasha iyo agabka lagaga hortago faafintaanka safwarka Covid-19, waxaanu yidhi, “Waxaa jira koox ka kooban lix xubnood oo aanu u dirnay dhammaan gobollada dalka oo dhan oo Xabsiyada oo dhan soo maray, isla markaana gaadhsiiyay qalabkii lagaga gaashaamanayay, sida af xidhkii, faraxalkii iyo daawooyinkiiba, waxaanay warbixin ka soo sameeyeen xaaladda maxaabiista oo laga war haya dhammaan xaalada ay ku waabariisatay Maxaabiistu”.
Waxa kale oo uu Wasiir Saleebaan ka hadlay tallaabooyin muhiim u ah badbaadada Maxaabiista Jeelasha ku xidhan oo ay ka wasaaradd ahaan qaadeen waxaanu yidhi, “Waxaa kale oo ka mida tallaabooyinka aanu ku tallaabsanay ee ciidamada asluubta aanu isla kaashanay in Maxaabiista la kala durkiyo oo Jeelasha la isu miisaamo. Jeelasheenu waxay isugu jiraan kuwa dhammaaday oo la dhisay, kuwa la dayactirayna waa leeyihiin, kuwa dayactir u baahana waa leeyihiin. Maxabiista la soo xidhayo ee muwaadiniin iyo ajaaniba leh iyo Xabsiyadeenu waa kala culus yihiin.”
“Sidaasi darteed waxa aanu ku dadaalnay in xataa Maxaabiista la kala durkiyo, la kala yareeyo, Jeelasha la isu miisaamo, iyada oo aanu hadda jiraynin isu-baddelkii Maxaabiista ee ahaa Xabsi ilaa Xabsi, balse Xabsi kasta gudihiisa in fursado la kala siiyo Maxaabiista ayaanu ku dadaalnay, waana wax aanu is leenahay halagu yareeyo faafitaanka xannuunkani,” Sidaas ayuu yidhi Wasiirku.
Waxaa kale oo uu tilmaamay in uu meel wanaagsan marayo dhismaha Xabsigii dhaqan celinta carruurta ee Mijacaseeye, dhawaana ay bilaabayaan sidii carruurta Jeelasha ku xidhan looga soo saarilahaa ee loo gaynlahaa Xabsiga Mijacaseeye, si ay u sii wataan geedi socodkoodii waxbarasho.
Somalilandpost.net
contact@somalilandpost.net
Follow us On
