Hargeysa (SLpost)- Xukuumadda Somaliland, ayaa sheegtay inay kaga garnaq-sanaysay Shirarka Wada-hadallada u socda Soomaaliya eedayn maamul-goboleedka Puntland ugu jeediyey inay taakulayso maleeshiyaadka Al-Shabaab ee ka dagaalama Buuraha Gal-gala ee gobolka Bari.
Wasiir ku-xigeenka Maamulka gobollada iyo Degmooyinka ee Wasaaradda Arrimaha Gudaha Md Cismaan Garaad Soofe, ayaa gef iyo meel-ka-dhac aan loo meel-dayin ku tilmaamay eedaymo Puntland ugu jeediyey Somaliland inay taageerto kooxda Xag-jirka ah ee Buuraha Gal-gala kula dagaalanta ciidanka maamul-goboleedkaas.
Wasiirka oo maanta warbaahinta kula hadlay xafiiskiisa, waxa uu sheegay in beesha caalamku ka war-hayso xaqiiqada ka jirta Somaliland isla markaana ay arrintaas kaga hadli doonaan wada-hadallada u socda Dawladda Soomaaliya maadaama maamul-goboleedka Puntland ka tirsan yahay Somaliya.
Md Cismaan Garaad Soofe oo ka jawaabayay eedaha maamul-goboleedkaasi u jeediyey Somaliland, waxa uu yidhi, “Waxaan ka jawaabayaa war uu ku baahiyay saxaafadda ninka ah Wasiirka amniga ee Puntland, warkaas oo ah mid waxba kama jiraan ah, war been abuur badani ku dhex jiro, gef badana ka dhex muuqdo, waxyaabahaasina kuwo aanu qabno aanay ahayn.arrimo badan ayuu ka hadlay.”
“Waxaanu leenahay wasiirka amniga Puntland deris wanaag baa inaga dhexeeya, deris-wanaaggana in la xumeeyo ma fiicna. Annagu waanu ku dedaalaynaa waxkasta oo dhib ama isku dhac inoo keeni kara inaanu ka digtoonaano, hase ahaatee sidaad wax u wadda maaha sidii derisku ahaan jiray ee waa deris xumo, hadallada aad sheegaysaan waxa ku jira deelqaaf badan. Arrimaha aad ka hadlaysay ee ay ka mid ahayd in annagu kooxda Al shabaab la saaxiib nahay ama meesha annagu aanu ku hayno waa mid aanay waxba ka jirin caalamka oo dhanna ogyahay,” ayuu yidhi Wasiirku.
Wasiirku waxa uu sheegay inay arrintan jawaab-bixinteeda kaga hadli doonaan wejiyada soo socda ee wada-hadallada Somaliland iyo Somaliya, waxaana hadalladiisa ka mid ahaa, “Dawladda Somaliya hadda waxa noo dhexeeyo wada hadal, wada hadalkaas oo ah mid si wanaagsan u socda oo aan immika la odhan karayn dhaliilo afka ah oo aanu u jeedinayno, wada hadalkaasina meel fiican buu marayaa, wasiirkana waxaanu jecel nahay gefafkaa badan ee uu na saarayo waxaanu kaga hadli doonaa shirarka aanu iskugu iman doono dawladda Somaliya, maadaama Puntland tahay maamul hoosta dawladda Somaliya,” ayuu yidhi Wasiirku.
Dhinaca kale, waxa uu wasiir ku-xigeenka Arrimaha Guduhu ugu baaqay maamul-goboleedka Puntland inay ilaaliyaan deris-wanaagga iyo xuduudaha Somaliland, waxaanu yidhi, “Arrinta dhanka xuduudaha in badan baa lagu celceliyay, xuduudu waxay tahay waa la yaqaanaa, Somaliland dhulkeedu intuu yahayna waa la ogyahay waana wax caalamiya oo loo garanayo, adiguna waxaan filayaa waad garanayso haddii aanad is yeelyeelayn, wax laga noqonayana maaha, sidaa ay tahay cid ka bedeli karaysaana haba yaraatee ma jirto, afkaaga iyo hadalkaagutoona ma beddelayo. Waxaan guud ahaan ku hadlayaa kana cadaynaya in hadalkaasi yahay deelqaaf.”
SOMALILANDPOST.NET
