Hargeysa (SLpost)- Wasaaradda Horumarinta Caafimaadka Somaliland, ayaa sheegtay inay Shan qof gudaha dalka ugu geeriyoodeen Cudurka Covid-19 oo la sheegay inuu mar kale soo laba-kacleeyey.
In ka badan 180 qof, ayaa xannuunka laga helay saddexdii bilood ee u dambeeyey sannadkan, sida uu sheegay Wasiirka Wasaaradda Horumarinta Caafimaadka Somaliland Cumar Cali Cabdillaahi oo maanta la hadlay warbaahinta.
![Wasiirka Caafimaadka Somaliland](https://usercontent.one/wp/somalilandpost.net/wp-content/uploads/2020/10/Wasiirka-Caafimaadka-Somaliland.jpg?media=1698175526)
”Bishan aynu hadda ku jirno 140 ayaa xannuunka laga helay, bishii ka horeysay waxay ahayd 27 qof, tii kasii horeysay 22 qof, markaa waxaan dareemi karnaa in uu kor-u-kac aad ahi jiro. Dhimashadu ilaa hadda waxay maraysa 5 qof,” ayuu yidhi Wasiiku.
Wasiirka ayaa sheegay in Soo laba kaclaynta Caabuqa CoronaVirus uu qiyaas ahaan boqolkii Shan kor-u-kac ah sameeyay maalmahii u danbeeyey marka laga qiyaas qaato tirada guud ee dadka la baadhay.
“Maalmahan u danbeeyay xaaladaha xanuunka Covid-19 kor bay usoo kacayeen, shalay oo u danbaysay dadkii la baadhay oo ahaa 400 waxa laga helay 20 oo macnaheedu tahay 100 kii qof 5 qof ayaa qaba, arrintaasi waa mid war-war abuuraysa oo waajib ka dhigaysa in lala dagaalamo,” Sidaas ayuu yidhi Wasiirka Wasaaradda Horumarinta Caafimaadka Somaliland.
Sida ku xusan mareegta xogta xannuunka Covid-19 ee Somaliland, tirada guud ee dadka xannuunka laga helay ayaa gaadhaysa 4,608 qof oo 311 ka mid ahi u geeriyoodeen xannuunka, waxaana ka bogsaday 3,899 Qof. Guud ahaan Somaliland, 51,903 qof ayaa xannuunka iska baadhay.
Toddoobaadkii hore waxa guud ahaan dalka ka bilaabmay wejiga 3aad ee tallaalka ka hor-tagga caabuqa Coronavirus, kaddib markii horaantii sannadkan dalka laga keenay Tallaalka lagaga hortago cudurka Covid-19.
Somalilandpost.net
contact@somalilandpost.net