Hargeysa (SLpost)- Shirkadda Global Tech Solutions (GTS) oo ka mid ah shirkadaha hormuudka ah ee bixiya adeegyada casriga ah ee samaynta Software-rada iyo Barnaamijyada ku shaqeeya telefoonada Gacanta ee Mobile Apps, ayaa si weyn uga dhex-muuqatay Carwada Shirweynaha Tiknoolajiyadda ee Somaliland oo maanta ka furmay Hotel Maansoor ee magaalada Hargeysa.
![](https://somalilandpost.net/wp-content/uploads/2019/09/69572190_1214060998766874_778356126822432768_n-e1567902357762.jpg)
Shirkadda GTS oo ka mid ahayd shirkado wacdaro ka muujiyey madasha Carwada oo ay ku soo bandhigtay adeegyada kala duwan ee ay bulshada u qabtaan, waxa ay xarunteeda ugu weyn ku taallaa caasimadda Hargeysa, wax-qabadkeeda waxa ka mid ah adeegyo lacag la’aan ah oo ay shirkaddu ku taageertay qaar ka mid ah ha’yadaha iyo Wasaaradaha dowladda oo baahi weyn u qabay samaynta barnaamijyo (Database) ay ku shaqeeyaan, sida uu sheegay Maamulaha Guud ee shirkadda GTS Khaalid Maxamed Sheekh oo sharraxaad ka bixiyey noocyada adeegyada ay bixiyaan. .
“Qayb kasta oo ka mid ah waxyaabaha nolosheenu ku tiirsan tahay, sida caafimaadka, waxbarashada iyo ganacsigaba adeegyada aanu bixinno way soo galayaan. Tusaale ahaan, haddii aad leedahay Hudheel, waxaad u baahan tahay nidaam aad ku maamusho xisaabaadkaaga iyo is-diiwaangelinta macaamiisha. Haddii aad Iskuul leedahay, waxaad u baahan tahay nidaam aad ku diiwaangeliso ardayda, intaasiba adeegyada aanu qabanno ayay ka mid tahay,” Sidaas waxa yidhi maamulaha GTS Khaalid Maxamed Sheekh.
![](https://somalilandpost.net/wp-content/uploads/2019/09/GLOBAL-TECH.jpg)
Khaalid Maxamed Sheekh oo sharraxayay doorka shirkaddoodu ka qaadato horumarinta adeegyada bulshada ee hay’adda dowladdu u qabtaan dowladda, waxa uu yidhi, “Waxa kale oo aanu ka qayb-qaadanaa adeegyada ay dowladdu u hayso dadweyaha oo aanu fududayno in hab casri ah oo computer-ka ku shaqaynaya laga dhigo oo sida ay u shaqayso (dowladdu) ay ka dhigto qaab casri ah oo dhaqaalaha ay ku dhawrato, wakhti fara badan oo kaga dhici lahaana waraaqaha iyo nidaamka inta badan iska daba-wareegga ah”.
Guddoomiye Khaalid Maxamed Sheekh waxa uu sheegay in shirkaddoodu ku guulaysatay fulinta mashaariic dhowr ah oo ay u sameeyeen Wasaaradda Horumarinta Jidadka iyo Gaadiidka, kuwaas oo uu sheegay inay shirkad ahaan ugu tabaruceen wasaaradda si ay uga qayb-qaataan horumarka dalka.
“Wasaaradaha aanu la shaqayno waxa ka mid ah wasaaradda Gaadiidka waxaanu u samaynayo ilaa Todoba Barnaamij oo dhammaantood wada-shaqeeya oo wada-hadla kana shaqeeya dhammaan xafiisyada gobollada Jamhuuriyadda Somaliland,” Sidaas ayuu yidhi Khaalid Maxamed Sheekh.
Isaga oo hadalkiisa sii watay, waxa uu yidhi, “Todobadaas (mashruuc wax-qabad), laba mooyaane, shanta kale waxay ahaayeen lacag la’aan oo waxaanu kaga qayb-qaadanay dalka horumarkiisa kaddib markii aanu aragnay siday wasaaradda uga go’antahay hirgelintooda”.
Si kastaba ha ahaatee, Shirkadda Global Tech Solutions (GTS), ayaa ka mid ah shirkado faro-ku-tiris ah oo dalka gudihiisa kaga shaqeeya adeegyada Casriga ah ee Technologiyada la jaan-qaadaysa isbeddellada farsamooyinka hawl-qabad ee dunida.
Somalilandpost.net
contact@somalilandpost.net