London (SLpost)- Milatariga dalka Ruushka ayaa weerarro loo adeegsaday Gantaallo iyo diyaaradaha Is-wada ku qaaday qaybo ka mid ah gobollada dalka Ukraine oo caasimadda dalkaasi ku jirto.
Magaalo-madaxda Ukraine ee Kyiv, waxa goobo kala duwan lagu bartilmaameedsaday diyaaradaha aan duuliyaha lahan (Drones) oo walxaha Qarxa lagu rakibay, waxaana ka dhashay khasaare isugu jira dhimasho, dhaawac iyo burbur soo gaadhay dhismayaal waaweyn oo magaalada ku yaalla.
Maayarka magaalada Kyiv, Vitali Klitschko, ayaa sheegay inay caasimadda ku dhaceen 28 diyaaradaha Drones-ka ee Is-miidaaminta loo isticmaalo isla markaana ay ku dhinteen afar qof halka Saddex kalena dhaawacyo ka soo gaadhayeen. Maayarku waxa uu sheegay in qaybaha kala duwan ee magaalada laga maqlay toban Qarax oo waaweyn oo goobo muhiim ah ku dhacay.
Dowladda Ukriane, ayaa ku eedaysay dalka Iran ku eedaysay inay dowladda ruushka ka iibisay Diyaaradaha aan Duuliyaha lahayn ee Is-miidaaminta (Kamikaze) loo adeegsaday, kuwaas oo qayb ka noqday hubka ugu muhiimsan ee Milatariga Ruushku u adeegsado gudaha dalka Ukraine.
Wasiirka Arrimaha Dibadda ee Ukraine, ayaa midowga Yurub ugu baaqay inay cuna-qabatayn hor leh ku soo rogaan dalka Iran maadaama oo sida uu sheegay “cadowgooda” ka iibiyeen Diyaarado Is-miidaamin ah oo Shacabkiisa waxyeello loogu geystay.
Haseyeeshee, waxa eedayntan ka jawaabay Wasaaradda Arrimaha Dibadda ee Iran oo waxba kama jiraan ku tilmaantay. “Warka la faafiyey ee ku saabsan in Iran ay Ruushka siisay diyaaradaha aan duuliyaha lahayn waa mid dano siyaasadeed laga leeyahay, waxaana faafiyey saxaafadda reer galbeedka. Ma jiro wax hub ah oo aanu siinnay dhinac ka mid ah dalalka dagaalka ku jira,” sidaa waxa yidhi afhayeenka wasaaradda Arrimaha Dibadda Iran, Nasser Kanaani.
Madaxa siyaasadda Arrimaha Dibadda ee Midowga Yurub, Josep Borrell, ayaa sheegay in raadinayaan caddaymo dhab ah oo ku saabsan doorka uu dalka Iran ku leeyahay dagaalka Ruushka ee Ukraine.
Diyaaradaha aan Duuliyaha Lahayn ee Ruushku u isticmaalay weerarka maanta ee caasimadda Ukraine, ayaa u muuqda in dagaalku yeeshay weji kale, iyadoo xilligan ay si wada-jir ah carbis Milatari ugu jiraan Milatariga dalka Belarus iyo kuwa Ruushka oo la sheegay inay ku sugan yihiin meel aan ka durugsanayn xuduudka dalka Ukraine la leeyahay Belarus. Caasimadda dalka Ukraine ee Kyiv, ayaa u dhow xuduudka dalka Belarus oo ah saaxiibka kaliya ee Ruushku ku leeyahay Bariga qaaradda Yurub.
Somalilandpost.net
contact@somalilandpost.net
