Washington (SLpost)- Safiirkii hore ee Maraykanka u fadhiyey Soomaaliya, Danjie Stephen M. Schwartz, ayaa ka hadlay muhiimadda istaraatajiyeed ee magaalada Berbera u leedahay Dowladda Maraykanka iyo dalalka quwadaha adduunka ee danaynaya inay xidhiidh la sameeyaan Somaliland.
Danjire Stephen Schwartz oo waraysi dhinacyo badan xambaarsan siiyey warbaahinta Somalilandchronicle, waxa kale oo uu sheegay in bogcadda magaalada Berbera ku taallo u suurto-galinayso iyo isbeddelka horumarineed ee xilligan laga hirgeliyey u suurto-galinayso inay soo jiidato caalamka iyo waddamada danaynaya.
Safiirkii hore ee Maraykanka oo la weydiiyey Aragitidiisa ku aaddan qiimaha ay dowladda Maraykanka ugu fadhido Bogcadda istaraatarjiyadeed ee Somaliland kaga taallo Gacanka Cadmeed iyo Badda Cas, waxa uu ku jawaabay: “Berbera waxay u muuqataa inay ku taallo goob muhiim ah oo leh kaabayaal-dhaqaale oo dhiirrigelinaya dal kasta oo raadinaya saldhig milatari oo ku yaal goob istaraatiiji ah oo adduunka ah. Sida la ogyahay, Berbera iyo dekeddeedu waxay hore saldhig Milatari oo waxtar leh u ahayd Midowgii Soofiyeeti iyo Maraykanka oo uga dambeeyey xilligii lagu jiray Dagaalkii Qaboobaa, laakiin muhiimaddaas ay lahayd marna looma baahan, wax horumarin ahna laguma samayn imika ka hor.”
“Sidoo kale, sida ay Somaliland iyo Dekedda Berbera ugu yaallaan goob istiraatiiji ah oo loo baah una sii ahaan karaan, waxa uu qiimaha ay leeyihiin uu saamayn yeelan karaa marka ay jiraan goobo kale oo muhiim ah iyo sida hadba waxtarkooda looga faa’idaysan karo.” Sidaas ayuu yidhi Danjire Stephen.
Danjire Stephen Schwartz oo la weydiiyey wax uu ka ogyahay diyaarad milatari Maraykanku leeyahay oo la sheegay inay dhawaan fadhiisatay garoonka Diyaaradaha ee Berbera, ayaa sheegay inaanu waxba ka kala socon arrintaas, laakiin waxa uu xusay inay tallaabo wax-ku-ool ah u tahay Milatariga Maraykanka inay booqdaan oo qiimeeyaan goobaha ay u arkaan inay saldhig milatari u isticmaali karaan, waxaanu tallaabooyinka qiimaynta indho-indhaynta ah ku shegay inay mid noqon karaan hawl-gallo bani’aadamnimo oo lama filaan ah, diyaarado soo fadhiista garoonka, Maraakib milatari oo dekedda soo booqda iyo tallaabooyin kale oo Qiimayn ah.
Dibloomaasigan oo xilka safiirka Maraykanka ee Soomaaliya hayey intii u dhaxaysay sannadkii 2016 ilaa 2017-dii, waxa kale oo uu waraysiga ka hadlay sida ay Somaliland uga faa’idaysan karto xidhiidhka dibloomasiyadeed ee ka dhexeeya Taiwan iyo go’aanka xukuumadda Somaliland ka qaadatay Qaxoontiga u dhashay Afghanistan oo inay muddo-kooban marti-galiyaan loo soo bandhigay.
Somalilandpost.net
contact@somalilandpost.net
