Hargeysa (SLpost)- Dowladda Maraykanka ayaa war ka soo saartay Socdaal uu Magaalada Hargeysa toddobaadkii hore ku yimi Safiirka dalkaasi Shane Dixon iyo nuxurka kulamo uu la qaatay jilayaasha siyaasadda Somaliland.
War-saxaafadeed maanta ka soo baxay safaaradda Maraykanku ku leeyahay Magaalada Muqdisho ee Soomaaliya, ayaa lagu sheegay in safiirka Ingiriisku shalay soo gunaanaday Socdaal uu maalmihii u dambeeyey ku joogay caasimadda Somaliland ee Hargeysa iyo kulamo kala duwan oo dhexmaray madaxweynaha Somaliland Md Muuse Biixi Cabdi iyo masuuliyiin sar-sare oo ka tirsan xukuumaddiisa.
Waxa war-saxaafadeedka lagu sheegay in safiirka Maraykanku uu sidoo kale kulamo la yeeshay wakiillo ka socday ururrada Bulshada Rayidka ah, madaxda Xisbiyada Waddani iyo UCID iyo sidoo kale wakiillo metelayey ururrada siyaasadda.
Warku wuxuu intaas ku daray in kulamadaas lagaga wada-hadlay qodobbo ay ka mid yihiin ammaanka mandaqadda, Xuquuqda Aadamaha, in talada laga qayb-galiyo bulshada iyo muhiimadda ay leedahay sii xoojinta hannaanka dimuqraadda
“Dowladda Maraykanku waxay ku diirsatay aqbalaadda heshiiska siyaasadeed ee ay soo jeediyeen Odayaasha Dhaqanka taasoo aan u aragno tallaabo wanaagsan oo loo qaaday qabsoomidda doorashooyin xor iyo xalaal ah,” sidaas ayaa lagu sheegay war-saxaafadeedka oo intaas ku daray in safiirka Maraykanku sidoo kale madaxda Somaliland kala hadlay sidii wada-xaajood loogu dhammayn lahaa xiisadda colaadeed ee ka taagan Magaalada Laascaanood.
“Wada-xaajoodka iyo u hoggaansanaanta geedi-socodka dimoqraadiyaddu waxay aasaas u yihiin bulsho kasta oo nabadgelyo haysta,” ayuu yidhi Safiirka Marayanka Shane Dixon, sida war-murtiyeedka lagu sheegay.
Danjire Dixon wuxuu ka hadlay mowqifka Dowladda Maraykanka ku qaabishay heshiiska lagu soo afjaray khilaafkii siyaasadeed ee ka dhashay Doorashooyinka madaxtooyada iyo Ururrada Siyaasadda.
“Maraykanku waxa uu bogaadinayaa dadaallada dhammaan metalayaasha Siyaasadda ee Somaliland sida ay uga wada-shaqaynayaan danta guud ee ka dhaxaysa,” sidaas ayuu Danjire Dixon ku yidhi war-murtiyeedka caawa ka soo baxay safaaradda Maraykanka.
Danjire Shane Dixon, ayaa ah dublomaasi si ku-meel-gaadh u haya xilka Safiirnimada Maraykanka, isagoo ku magacaaban darajo ka hoosaysa Safiirka, kaddib markii dowladda Maraykanku hoos u dhigtay meeqaamka sarkaalka dublomaasiyeed ee u fadhiya Muqdisho bishii May ee sannadkan 2023 oo darajada booskan laga dhigay Chargé d’Affaires oo ah darajo si ku-meel-gaadh ah u haya xilka diblomaasiyga ugu sarreeya Safaaradda, waxaana loo magacaabag Timothy Trenkle oo xilkaas hayay ilaa July 24, 2023-kii.
Darajada Xilka Safiir buuxa oo safaaradda Maraykanka ee Muqdisho loo magacaabo waxa ugu dambeeyey Ambassador Larry André oo xilkaas hayay bishii 30-kii May 2023-kii.
Dowladda Maraykanka, ayaa safka hore kaga jirta daneeyeyaasha Beesha Caalamka ee taageerta hannaanka dimuqraadiyadda iyo doorashooyinka Somaliland.
Somalilandpost.net
contact@somalilandpost.net
