Hargeysa (SLpost)- Gudaha magaalada Laascaanood, waxa lagu dilay Nin Ganacsade ah oo lagu magacaabo Cabdiraxmaan Doora-Qoosh, kaas oo Si Weyn looga yaqaannay gudaha magaaladaas iyo deegaannada ku xeeran.
Marxuumka oo hayb ahaan ka soo jeeda Beesha Ugaadhyahan ee Dhulbahante, ayaa la sheegay inay gudaha magaalada ku toogteen Ciidamada maamul-goboleedka Puntland.
Wararka aanu ka helayno magaalada Laascaanood, ayaa lagu sheegay in sababta ka dambaya dilka loo geystay marxuumku la xidhiidho arrimo siyaasadeed oo la xidhiidha dhinaca kala duwanaanshiyaha afkaarta oo mudo dhextaalay.
Warku wuxuu intaa ku daray in Marxuumka Dilka loo geystay oo u dhashay Beesha Nuur Axmed oo degta degmada Taleex uu afkaar ahaan ka soo horjeeday damaca Siyaasadeed ee maamul-goboleedka Puntland ku sheegto gobolka Sool, iyada oo arrintan awgeed marxuumka loogu geystay dhaawac dhinaca caloosha ah.
Marxuum Cabdiraxmaan ayaa ka mid ahaa Ganacsatada Qaadka iibiya ee sida weyn looga yaqaanno gobolka Sool, waxa caweysinkii Caawa badhtamaha magaalada Laascaanood ku toogtay maleeshiyaadka maamul-goboleedka Puntland oo ciidamo tiro badan ka joogaan magaalada Laascaanood oo ay xilligan ku sugan malleeshiyaad Huwan ah oo Qaab Qabiileysan u yimi magaalada si ay ula dagaalamaan ciidamada Qaranka ee Somaliland.
Dilka Marxuumka oo Meydkiisa la geeyey cusbitaalka magaalada Laascaanood, ayaa khilaaf ba’an ka dhex-abuuray malleeshiyaadka Huwanta ah ee ku sugan magaalada Laascaanood, kaddib markii ay arrintan si weyn uga xumaadeen malleeshiyaad u badan qaadleyaasha magaalada iyo beesha uu marxuumku dhalasho ahaan ka soo jeedo oo ka Gadooday dilka marxuumka.
Gadoodkan ayaa sababi gaadhay isku dhac hubaysan oo gudaha magaalada ku dhexmara maleeshiyaadka Huwanta ah oo aaminsan afkaaro siyaasadeed oo kala ujeeddo ah balse ka midaysan aragti Isir-nacayb ah Oo ay kaga soo horjeedaan Somaliland.
Maleeshiyaadka maamul-goboleedka Puntland ayaa sidan oo kale magaalada Laascaanood ugu dilay shaqsiyaad caan ka ah magaalada dhowrkii toddobaad ee u dambeeyey, waxaanay mar kasta oo ay ka cabsadaan inuu bannaanka u soo baxo khilaafka, kala qaybsanaanta iyo utunaha ay malleeshiyaadku kala tirsanayaan weerarro miidaamo ah ku soo qaadaan fadhiisimada ciidamada qaranka Somaliland oo ay dhibaaxo kulul kala kulmaan.
Ciidanka Qaranka Somaliland, ayaa magaalada Laascaanood kula dagaalamaya maleeshiyaadka huwanta Oo ka Kooban Kuwa Deegaanka, Kooxo Argagixiso ah, ciidamada maamul-goboleedka iyo malleeshiyaad hayb ahaan uga qayb-qaadanaya dagaaylka kuwaas oo kala yimi Soomaaliya iyo Ethiopia.
Somalilandpost.net
contact@somalilandpost.net
Follow us On
