Hargeysa (SLpost)- Madaxweynaha Somaliland Md Axmed Maxamed Siilaanyo, ayaa go’aanka geesinimo leh oo bar-bilow u ah Aqoonsi Somaliland hesho ku tilmaamay tallaabadii golaha deegaanka magaalada Sheffield ee dalka Ingiriisku ku taageereen qaddiyadda madax-bannaanida Somaliland.
Madaxweyne Siilaanyo oo maanta khudbad qiime leh ka jeediyey dabbaal-degga munaasibadda 18-ka May ee maalinta madax-bannaanida Somaliland, waxa uu golaha deegaanka iyo jaaliyadda Somaliland ee magaalada Sheffield ku bogaadiyey tallaabada wax ku-oolka ah ee ay ku taageereen qadiyadda Somaliland, taas oo ku tilmaamay inay dhiirri-gelinayso inay beesha caalamka ka badheedho Aqoonsiga Somaliland.
“Waxaan u mahad-naqayaa xildhibaannada Sheffield Council oo Somaliland garab istaagay isla markaana aqoonsaday madaxbannaanida Jamuuriyadda Somaliland. Waa bilow horseed u noqonaya helidda aqoonsi caalami ah. Waxaan iyana la ilaawi karin jaaliyada Somaliland ee ku dhaqan Sheffield iyo guud ahaan dalka UK oo gacan wayn hawshaas ka gaystay. Hore ayaa loo yidhi kun talaabo waxay ka bilaabmaan hal talaabo ee waxaa inaga reeban nugayl iyo niyad jab,” ayuu yidhi Madaxweyne Siilaanyo.
Madaxweynuhu wax auu dhinaca kale baaq u diray beesha Caalamka oo uu u jeediyey inay tixgeliso rabitaanka iyo go’aanka ay shacabka Somaliland aaya-hooda kaga tasheen, isaga oo dhinaca kale ballan-qaaday inay xukuumaddiisu sii xoojinaysa xidhiidhka wada-shaqayneed ee u dhexeeya dalalka deriska si loogu guulaysto ilaalinta xasiloonida mandaqadda Geeska Afrika.
“Waxaan ugu baaqayaa waddamada beesha caalamka inta xidhiidhka wada shaqayntu innaga dhaxeeyo iyo inta kaleba in ay tixgeliyaan, isla markaana taageeraan go’aanka iyo aayo ka tashiga shacbiga Somaliland, xaq u leeyahay,” ayuu yidhi Madaxweynaha Somaliland oo la hadlayey beesha caalamka.
Madaxweynuhu waxa uu ballan-qaaday inuu xoojinayo xidhiidha dalalka deriska ah, waxaanu yidhi, “Xukumadaydu waxay sii xoojinaysaa wada shaqaynta iyo iskaashiga dalalka deriska ah, si gobolka Geeska Afrika u noqdo mandiqad nabad-gelyo ah, taas oo ay shucuubtoodu isu soo hiloobaan kana faa’iideystaan fursadaha is weydaarsiga ganacsi iyo aqooneed. Waxaan mahadnaq iyo bogaadin u dirayaa dalalka nagala shaqeeya dimuqraadiyadda, nabadgelyada iyo iskaashiga dhaqaale.”
Waxa kale oo Md Siilaanyo baaq u jeediyey shacabka Somaliland, waxaanu hadalladiisa ka mid ahaa, “Waxaan shacbigayga ku dhiiri gelinayaa in ay dhexda marada ku xidhaan siina laban laaban dedaalka ku aaddan ka midho dhalinta qadiyadda aayo ka tashigeena. Waan hubaa in aynu heli doono ictiraaf caalami ah, balse waxaa la inooga baahan yahay dedaal iyo in aynu gacmaha is qabsano,” ayuu yidhi Md Axmed Siilaanyo.
SOMALILANDPOST.NET
