“Waxaanu nahay umad doorasho ku timi, waxaanu ku nimi qaab-doorasho oo sharci ah, qaab-sharci ahna waanu kaga baxaynaa Insha Allah, intaas ka horeysana waxaanu u shaqaynaynaa waa umaddii iyo dalkii,”
Hargeysa (SLpost)- Madaxweynaha Somaliland Md Axmed Maxamed Maxamuud (Siilaanyo), ayaa shacabka Somaliland ka dalbaday inay kalsooni siiyaan isla markaana ay aaminaan xukuumaddiisa oo uu sheegay inay ka go’an tahay ka midho-dhalinyata waajibaadka iyo karaamada shacabku kalsoonidu ku siiyaan xilligii uu doorashada madaxtinimada dalka ku guulaystay afar sanno iyo dheeraad ka hor.
Md Axmed Maxamed Siilaanyo oo maanta ka hadlayey munaasibad uu xadhigga kaga jaray 5=KM oo ka mid ah dhismaha Waddada CAD oo magaalada Hargeysa ku xidhay degmada Sallaxley, waxa uu sheegay inay xukuumaddiisu kalsooni iyo aaminaad ku qabto shacabka Somaliland, balse waxa uu ka codsaday inay ka hortagaan cid kasta oo khal-khal gelinaysa xasiloonida iyo Ammaanka dalka.
Madaxweynuhu waxa uu ku faanay inay xukuumaddiisu muddadii xilka ay haysay ku tallaabsatay wax-qabad la taaban karo oo saamayn ku yeeshay dhammaan adeegyada bulshada, isaga oo ku adkaystay inay ka go’an tahay sii-ambaqaadka dedaallo maamul ahaan ay ugu jiaan horumarinta adeegyada Aasaasiga ah ee bulshada.
Md Siilaanyo oo daba-socday eedaymo mucaaradku ugu jeediyaan muddo-kordhin xukuumaddiisu ku baajinayso doorashooyinka madaxtooyada iyo Golaha Wakiillada ee ku muddeysan badhtamaha sannadka dambe, waxa uu sheegay inay xukuumad ahaan talada iyo hoggaaminta dalka ku wareegayaan sifo sharci ah oo la mid ah qaabkii loogu aaminay ee loogu doortay inuu madaxweyne ka noqdo dalka.
“Nabadgelyadu dalku waa wax muhiim u ah horumarka dalka, haddii aynaan wada-jir ku shaqaynin oo umaddu meel is-wada taagin. Waxaanu nahay umad doorasho ku timi, waxaanu ku nimi qaab-doorasho oo sharci ah, qaab-sharci ahna waanu kaga baxaynaa Insha Allah, intaas ka horeysana waxaanu u shaqaynaynaa waa umaddii iyo dalkii,” ayuu yidhi madaxweyne Siilaanyo.
Madaxweynaha oo hadalkiisa Sii watay, waxa uu intaas ku daray oo yidhi, “Waxaanu codsanaynaa umadda iyo dadkuba inay na aaminaan, annaguna waanu idin aaminsannahay, kalsooni badanna na siisaan, sidaad horeba noogu siiseen. Annagana waxaad nooga talo-gashaan inaysan jirin waxaanu kala hadhayno umadda ee wixii aanu u qaban karnaba aanu u qabanayno, hadday tahay waddooyinka, hadday tahay horumarinta dalka. Intii immika aanu qabannayna wax cad oo muuqda weeyi dhinac kasta oo ay tahayba, inta ka hadhayna Insha Allah waanu kordhin doonaa, waanu ka sii badin doonnaa.”
“Markaa waxaanu rejaynaynaa inuu Illaahay Garabkayaga Galo, inaynu wax wada-qabsanno inay meel uga soo wada-jeesanno, wixii xumaan iyo dhibaato wadana, aynu iska leexinno oo iska qabanno,” ayuu yidhi Madaxweynaha Somaliland.
SOMALILANDPOST.NET
