Hargeysa (SLpost)- Madaxweynaha Jamhuuriyada Somaliland Mudane Axmed Maxamed Maxamuud (Siilaanyo) ayaa xafiiskiisa ku qaabilay Wefti uu hoggaaminayo Safiir ku-xigeenka Ingiriiska ee Dalka Ethiopia gaar ahaan Addis Ababa Mr Chris Allan oo maanta socdaal ku yimi dalka.
Kulankan ka dib waxa qasriga madaxtooyada Shir Jaraa’id si wada jir ah ugu qabtay Wasiirka Ganacsiga iyo Maalgashiga caalamiga ee Somaliland iyo Safiir ku-xigeenka Ingiriiska u fadhiya magaalada Addis Ababa oo labadoodu ka xog-warramay nuxurka kulanka dhexmaray labada dhinac iyo heerka uu wakhtigan marayo xidhiidhka Somaliland iyo Ingiriisku.
Wasiirka Ganacsiga iyo Maal-gashiga Somaliland Dr. Maxamed Cabdilaahi Cumar ayaa sheegay in socdaalka Safiir Ku xigeenku la xidhiidho sidii loo sii xoojin lahaa wax wada qabsiga Somaliland iyo Ingiriiska waxaanu yidhi, “Waxa maanta socdaal ku yimid dalka Safiir Ku xigeenka Ingiriiska u fadhiya Addis-ababa, Chris Allan oo horena dalka u yimid. Socdaalkan oo muujinaysa xidhiidhka wanaagsan ee ka dhaxeeya Britain iyo Somaliland ee dhinacyada nabad-gelyada iyo dhaqaalaba leh.”
“Ingiriisku waa dalka mucaawimada ugu badan siiya Somaliland, waxaanan la leenahay dawlad ahaan iyo shacbi ahaanba xidhiidh soo jireen ah oo ah wax wada qabsi si isku dheeli-tiran ay labada dal u shaqeeyaan,”ayuu yidhi Wasiirka Ganacsigu.
Dr. Maxamed Cabdilaahi oo hadalkiisa sii watay waxa uu intaas ku daray “imikana booqashadiisa iyo kulanka uu la yeeshay madaxweynuhu waxay la xidhiidhaa sii kobcinta xidhiidhka labada dal.”
“Ingiriisku waa Saaxiibbada ugu dhow-dhow ee ay Somaliland ku leedahay Adduunka reer Galbeedka, waxaanan rejaynaynaa inuu xidhiidhkaasi sii kardho,” ayuu yidhi Wasiirka Ganacsiga iyo Maalgashigu. Waxaanu intaas ku ladhay, “Waxa beryahan dambe soo baxayay muranno iyo hadallo aan xaqiiq ahayn oo sheegayay in xidhiidhka Somaliland iyo Inigiriisku uu sidii hore ka khafiifsan yahay. Arrintaas oo ah mid aan jirin oo ka fog xaqiiqda.”
“Waa dalka ugu badan ee amniga iyo dhaqaalaha kala shaqeeya Somaliland, imikana waxay nagala shaqaynayaan dhinacyo cusub,”ayuu intaas raaciyay.
Sidoo kale safiir Ku xigeenka Ingiriiska u fadhiya Itoobiya Mr. Chris Allan ayaa sheegay inuu ku faraxsan yahay socdaalkiisa Somaliland oo ah dal uu ka dhaxeeyo wax-wada qabsi soo jireen ah oo ku wajahan dhinacyada dhaqaalaha iyo amniga. Waxaanu tilmaamay in iskaashigaasi uu yahay mid mar kasta la sii xoogeynayo oo aan hoos u dhici Karin.
“Aniga oo ku hadlaya magacayga iyo ka Dadka Ingiriiska, waxaan shacbiga Somaliland ku bogaadinayaa Sannadka Cusub ee Islaamka, Sannad-wanaagsan” ayuu yidhi Ambassador Chris Allan, isaga oo intaas raaciyey Kelmad Af-Soomaali ah oo uu ku muujinayay sannadka cusub ee Islaamka, “Sannad Wacan,” ayuu yidhi.
Danjiruhu waxa uu intaas ku daray inay madaxweynaha isla faaqideen qodobo la xidhiidha mashaariic horumarineed oo todobaadyada soo socda bilowgooda ay xukuumadaha Somaliland iyo Ingiriiska si wada-jir ah ugaga dhawaaqi doonaan magaalada Hargeysa.
Kulanka dhexmaray dawladaha Ingiriiska iyo Somaliland, waxa madaxweyne Siilaanyo dhankiisa ku wehelinayey Wasiirka Ganacsiga iyo Maalgashiga Caalamiga ah Dr Maxamed Cabdilaahi Cumar iyo Wasiirka Qorsheynta Qaranka Dr Sacad Cali Shire.
SOMALILANDPOST.NET
contact@somalilandpost.net
