Hargeysa (SLpost)- Madaxweynaha Jamhuuriyadda Somaliland, Mudane Muuse Biixi Cabdi, ayaa galabta ka qaybgalay Aas qaran oo xabaalaha Baqiic ee Waqooyiga caasimadda Hargeysa loogu sameeyey marxuum Cabdiqaadir Xaashi Cilmi oo kamid ahaa ganacsatada waaweyn ee dalka.
Marxuumka oo dorraad ku geeriyooday Cusbitaal ku yaalla dalka Hindiya oo xaalad caafimaad loogu qaaday, ayaa meydkiisa maanta laga soo dejiyey gegida diyaaradaha ee Hargeysa.
Madaxweynaha oo ay wehelinayaan xubno kamid ah golaha wasiirrada, taliyeyaal ciidan, madax katirsan hay’adaha madaxa bannaan ee qaranka, xildhibaanno, madaxda dawladda Hoose ee caasimadda Hargeysa oo uu hormuud u ahaa maayarka caasimadu, siyaasiyiin, ehelka marxuumka iyo boqollaal katirsan shacabka ku dhaqan magaalada Hargeysa, ayaa ka qaybgalay Aas qaran oo loo sameeyey marxuum Cabdiqaadir Xaashi Cilmi oo kamid ahaa hormuudka ganacsiga Huteellada casriga ee Somaliland ka hanaqaaday.
Aaska qaran ee loo sameeyey marxuumka, ayaa waxa hadallo tacsi loogu dirayo ehelka, laguna sheegayo wanaaggii iyo samo-falkii marxuumka, ka jeediyey xubno kamid ah golaha wasiirrada, siyaasiyiin iyo haldoor kale oo ay aqoon isu lahaayeen marxuumka, kuwaas oo ku dheeraaday sidii uu caanka ugu ahaa garab istaagga dadka jilicsan iyo samo-falkaba.
Madaxweynaha Jamhuuriyadda Somaliland, Mudane Muuse Biixi Cabdi oo goobta jinaasada ka hadlay, ayaa ugu horrayn tacsi tiiraanyo leh u diray ehelka, qaraabada iyo guud ahaan shacabka reer Somaliland ee uu marxuum Cabdiqaadir Xaashi Cilmi ka baxay, waxana uu ku sifeeyey addoon wanaag badan iyo samo-fal hormarsaday.
Madaweynuhu waxa uu marxuumka ku sifeeyey hal-abuure ganacsi oo maskax furnaa, xilli duruufo adagi jiraanna ku dhiirraday inuu dalkiisa maalgashado,“Cabdiqaadir Xaashi wuxuu ahaa nin hal-abuur leh oo ganacsiga Ilaahay u fududeeyey, weliba muddadaa soddonka sanno ah ee dalka lagu soo noqday hal-abuur weyn iyo Hudheello waaweyn abuuray, intaasna garab waday samo-fal badan oo dadka danyarta ah,” ayuu yidhi madaxweyne Muuse Biixi Cabdi.
Marxuum Cabdiqaadir Xaashi Cilmi, ayaa kamid ahaa mulkiilihii huteellada Maansoor ee ka dhisan magaalooyinka waaweyn ee Somaliland, waxana uu dhawaan ku geeriyooday dalka India oo caafimaad ahaan loo geeyey, maantana dalka la keenay, laguna aasay.