Hargeysa (SLpost)- Madaxweynaha Somaliland Md Axmed Maxamed Maxamuud (Siilaanyo), ayaa dawladda Soomaaliya ugu baaqay inay ka waan-towdo faro-gelinta ay ku hayso iyo ka-hadalka arrimaha ka jira gudaha Somaliland, taas oo uu ku tilmaamay inay dhaawac u geysanayso wada-hadallada socda ee labada waddan.
Madaxweyne Siilaanyo oo daba-socda hadal shalay ka soo yeedhay dawladda dawladda Soomaaliya oo si qaawan uga hadashay shirkad hawl-gallo macdan-baadhis ah ka wadda gobolka Awdal ee galbeedka Somaliland, waxa uu sheegay inaanay Somaliland aqbali doonin faro-gelin ah kasta oo loogu soo xad-gudbo xuduudaheeda, isaga oo ku gooddiyey in xukuumaddiisa hab-dhaqan kasta oo gurracan ay kaga jawaab-celinayso mid la mid ah.
“Somaliland ma aqbali doonto nooc kasta oo faro-gelin ah oo xuduudaheeda lagu sameeyo. Tallaabo kasta oo qaldan oo nagaga timaadda waddanka aanu jaarka nahay ee Somaliya sida ay tahay ayaanu ugula macaamilaynaa,” sidaas waxa yidhi madaxweyne Siilaanyo oo arrintan kaga hadlay qoraal uu ku baahiyey bartiisa Twitter.
Madaxweynuhu waxa uu faro-gelinta dawladda Soomaaliya ku sheegay mid waxyeello u geysanaysa wada-hadallada socda ee labada waddan, waxaanu yidhi, “Waxaanu ku boorinaynaa dawladda Soomaaliya inay ka laabato ka-hadalka arrimaha khuseeya Somaliland, kaliya waxa ay dhaawacaysaa wada-hadallada socda.”
War shalay ka soo baxay Wasaaradda Macdanta iyo Badroolka Soomaaliya ayaa lagu sheegay inay xaalado amaan-darro ka abuurtay Gobolka Awdal Shirkad magaceeda la yidhaahdo ARC, lagana leeyahay dalka Shiinaha oo xukuumadda Somaliland heshiis kula galay hawl-gallo Macdan-qodis ah oo ay ka waddo gobolka Awdal deegaano ka tirsan.
“Howlaha ARC ay sida sharci-darrada ah uga waddo Somalia waxay abuurtay xasillooni-darro soo wajahday deegaannadaas, kadib markii ay boqolaal qof oo meleeshiyaad ah shaqaaleysay si ay u ilaaliyaan shirkadda iyo shaqaalaha howsha u wada, isla markasna ay barakicisay dadkii iyo duunyadii ku noolaa deegaankaas,” ayaa lagu sheegay qoraalka ka soo baxay Wasaaradda Macdanta Somalia oo shirkadda ugu baaqday inay joojiyo hawlaha macdan-qodista ah ee ay ka waddo gobolka Awdal.
Mushkiladaha warkan lagu sheegay iyo malleeshiyaadka barakaca sameeyay ayaa ah xaalad aan ka jirin Gobolka Awdal marka laga reebo tabasho salka ku haysa Saami qaybsi oo Reer Awdal tirsanayaan, waxaanu warkan dawladda Soomaaliya u muuqday mid lagaga faa’idaysanayo buun-buuninta arrintan.
SOMALILANDPOST.NET
