“Waxa hubaal ah in dhalinyaradu u baahan yihiin shaqooyin iyo nolol fiican, balse waxa lagu gaadhi karaa dedaalka iyo barashada cilmiga oo aan laga hadhin, sabir iyo is-kaashi waxaanan ku kalsoonahay in dadka reer Somaliland leeyahay hal-abuur iyo himilo fiican oo ay ku gaadhaan horumar.”
Hargeysa (SLpost)- Madaxweynaha Jamhuuriyada Somaliland Md Axmed Maxamed Silaanyo, ayaa maanta ka qaybgalay Munaasibad Qalinjebin ah oo loo qaybta Ardayda Sanadkan ka baxday Jaamacada Hargeysa University.
Munaasibadda uu madaxweynuhu saaka kala qayb-galay jaamacada Hargeysa, ayaa noqonaysa Jaamacadii Shanaad ee uu sanadkan la qaybsado farxada Qalinjebinta Ardayda iyo Waalidiintaba.
Waxa madaxweynaha ku wehelinayey munaasibadda oo kala qayb-galay xubno ka mid ah golihiisa Wasiirrada oo ay ka mid yihiin Wasiirrada Waxbarashada iyo Tacliinta Sare, Arrimaha Dibadda, Madaxtooyada. Waxa kale oo munaasibadda goob-joog ka ahaa xubno ka mid ah madax-dhaqameedka, Aqoonyahan, Xildhibaanno, waalidiin iyo qaybo badan oo ka mid ah haldoorka dalka.
Jawiga Saaka ayaa ahaa mid ka duwan sidii hore ee madaxweynuhu uga qaybgeli jiray xafladaha noocan oo kale ah ka dib markii ay gaadhiga Khaaska ah ee Madaxweynaha soo wada raaceen Gudoomiyeyaasha Xisbiyada Mucaaradka ah iyo Gudoomiyaha Xisbiga Muxaafidka ah ee Kulmiye oo iyaguna maanta goobjoog ka wada ahaa xafladan, hadalana ka soo jeediyey ka dib wada hadalo beryahanba u socday Xukuumada iyo Xisbiyada Mucaaradka oo la xidhiidha Diwaangelinta iyo Xaalada Dalkaba sidii meel looga soo wada jeedi lahaa.
Madaxweynaha oo halkaas khudbad dhinacyo badan taabanaysa ka jeediyey, ayaa qiray in dhalinyarada waxbaratay u baahan tahay shaqo-abuur balse waxay uu masuuliyadda hawshaas oo dawlad ahaan u dareensan yahay inay isaga saaran tahay uu isaga riixay cilmiga iyo aqoonta oo aan barashadooda laga hadhin in lagaga baxayo shaqo la’aanta haysata dhalinyarada Jaamacadaha ka baxday.
Madaxweynuhu waxa uu ugu horeyn bogaadiyey dhalinyarada waxbarashada dhammaysatay, waxaanu yidhi, “Ugu Horreyn waxaan halkan bogaadin uga soojeedinayaa Ardayda qalin-jebisay, macalimiinta iyo maamulka ku soo tabcay, waxaanan idinku hambalyeynayaa guusha aad gaadheen.
Waxbarashadu waa furaha nolosha, waa halbawlaha horumarka, waana hagaha mustaqbalka. Waxaanay umaduhu u kala horeeyaan, sida ay u kala aqoon iyo farsamo badan yihiin.
Sanadkan waxaan qalin-jebintooda ka qaybgalay in ka badan 4,000 oo arday welina way socdaan, taasi waxay daliil u tahay kobaca aqooneed iyo kaalinta ay dhalinyaradu ku leeyihiin Bulshada oo aad u saraysa, waxaa lagu qiyaasaa da’yarta Somaliland inay ka badan yihiin %60, taas oo muujinaysa in dalkani uu leeyahay mustaqbal fiican.”
Mudane Axmed Siilaanyo oo ka hadlayey shaqo la’aanta iyo dhalinyarada, waxa uu yidhi, “Waxa hubaal ah in dhalinyaradu u baahan yihiin shaqooyin iyo nolol fiican, balse waxa lagu gaadhi karaa dedaalka iyo barashada cilmiga oo aan laga hadhin, sabir iyo is-kaashi waxaanan ku kalsoonahay in dadka reer Somaliland leeyahay hal-abuur iyo himilo fiican oo ay ku gaadhaan horumar.
Dhalinyarooy dedaala oo Dalka illaashada una sabra waxaad gaadhi doontaan maalin aad aragtaan dunida oo inoo soo shaqo-doonatay inshaallaahu.”
Waxa kale oo munaasibadda ka hadlay Guddoomiyeyaasha Xisbiga UCID iyo Kulmiye Eng Faysal Cali Waraabe iyo Muuse Biixi Cabdi oo ka hadlay muhiimadda ay dalka u leeyihiin dhalinyarada waxbarashada dhammaysatay iyo kaalinta ay ka qaadan karaan horumarka dalka.
DAAWO SAWIRRADA