London (SLpost)- Dalalka Jamhuuriyadda Jabuuti, Imaaraadka Carabta iyo qaar ka mid ah dalalka ay xulafada yihiin ee Khaliijka Carabta, ayaa taageeray mowqifka dowladda Sucuudigu iska taagtay warbixin Sirdoonka Maraykanku ku sheegay in Dhaxal-sugaha Boqortooyadu ka dambeeyey hawl-galkii lagu khaarajiyey Jamal Khashoggi.
Warbixinta oo sirdoonku Maraykanku u gudbiyey Aqalka Congress-ka isla markaana Jimcihii shalay la baahiyey ayaa lagu sheegay in amiir Maxamed Bin Salmaan qorsheeyey hawl-galkii lagu dilay Jamal Khashoggi oo ah suxufi u dhashay dalka Sucuudiga balse ku noolaa Maraykanka, kaas oo sannadkii 2018 lagu kharaajiyey gudaha safaaradda Sucuudiga ee dalka Turkiga.
Haseyeeshee, war-murtiyeed isla Jimcihii shalay ka soo baxay Wasaaradda Arrimaha Dibada ee Boqortooyada Sucuudiga, ayaa lagu dedafeeyey warbixintaas iyo nuxurka ay xambaarsanayd oo lagu tilmaamay mid sawir qaldan ka bixinaysa hoggaanka boqortooyada isla markaana ah been-abuur aan la aqbali karin.
Haddaba war-saxaafadeed ay soo saartay wasaaradda Arrimaha Dibadda ee dalka Imaaraadka Carabta, ayaa lagu taageeray mowqifka dowladda Sucuudiga ee ku wejahan dilkii Jamal Kharashoggi, waxaana lagu sheegay inay dowlad ahaan kalsooni ku qabaan oo taageero u muujinayaan garsoorka dalka Sucuudiga iyo sida ay uga go’an tahay inay waajibaadkeeda sharci ka gudato cid kasta oo lala xidhiidhinayo masuuliyadda dilkaas.
Waxa warka ka soo baxay wasaaradda Arrimaha Dibadda lagu sheegay sida ay dowladda Imaaraadku uga soo horjeedda isku-day kasta oo lagu buun-buuninayo kiiska ama lagu faro-gelinayo arrimaha gudaha dalka Sucuudiga.
Sida aanu ka soo xigannay qaar ka mid ah warbaahinta Carabta, Dalka Jamhuuriyadda Jabuuti ayaa sidoo kale soo dhawaysay jawaabka Sucuudigu ka bixiyey warbixinta ka soo baxday sirdoonka Maraykanka ee ku saabsan dilka loo geystay Jamal Khashoggi, waxaanay Jamhuuriyadda Jabuuti muujisay sida ay uga soo horjeeddo faro-gelin kasta oo loola badheedho arrimaha gudaha dalka Sucuudiga.
Sidoo kale, wasaaradda Arrimaha Dibadda ee dalka Kuwait, ayaa taageero u muujisay jawaabka Wasaaradda Arrimaha Dibadda Sucuudiga ka bixisay warbixinta sirdoonka Maraykanka oo loo gudbiyey Aqalka Odayaasha dalka. Bayaanka ka soo baxay wasaaradda Khaarajiga Kuwait, ayaa sida lagu sheegay lagu bogaadiyey doorka dowladda Sucuudigu ka gaysatay baadhitaanka kiiska la xidhiidha dilkaas, waxaanay meel adag iska taagtay in faro-gelin lagu sameeyo arrimaha gudaha ee Boqortooyada Sucuudiga.
Ugu dambayn Dalka Bahrain ayaa sidaas oo kale ku garab-joogsaday Sucuudiga jawaabta ay ka bixiyeen warbixinta sirdoonka Maraykanka, iyadoo lagu xusay muhiimadda boqotooyada Sucuudigu u leedahay ammaanka iyo siyaasadda mandaqadda Bariga Dhexe.
Somalilandpost.net
contact@somalilandpost.net
