Seol (SLpost)- Shirkadda Hyundai qaybteeda Agabka iyo Gaadiidka Dhismaha (HCE) ayaa shaaca ka qaadday inay heshiis rasmi oo ay wakiil uga noqonayso dalalka Bariga Afrika la gashay shirkadda NEFC Group oo laga leeyahay dalka Ethiopia
Shirkadda Hyundai Construction Equipment (HCE) waxay Shirkadda NEFC heshiis kula gashay inay Qalabka iyo Gaadiidka ay soo saaraan u gaadhsiiyaan, kuna fidiyaan Suuqa Bariga qaaradda Afrika oo wax-soo-saarka shirkaddu ku yar yahay.
Sida lagu sheegay war-saxaafadeed ay soo saartay Shirkadda HCE, heshiiska ayaa suurta-galinaya in wax-soo-saarka Agabka Gaadiidka ee HCE uu gaadho Shan Waddan oo Somaliland ku jirto, kuwaas oo ay ka jiraan Shirkado xidhiidh ganacsi ka dhexeeyo shirkadda NEFC. Waddamadan ayaa kala ah Ethiopia, Djibouti, Somalia, Somaliland iyo South Sudan.
NEFC Group oo la sheegay inay waayo-aragnimo 156 sanno ah u leedahay ganacsiga Qalabka Dhismaha iyo Beeraha isla markaana ka shaqaysa ganacsiyo ay ka mid yihiin Macdanta, Huteellada, Duullimaadka i.w.m, waxa iska leh ganacsadaha ugu maal-qabeen dalka Ethiopia Mohammed Hussein Al Amoudi oo ah muwaadin u dhashay dalka Sucuudiga balse haysta dhalashada dalka Ethiopia.
“HCE waxay mar horeba dhidibbo adag ka aasaastay Suudaan iyo Aljeeriya, waxayna rajeyneysaa inay kasbato suuqyada dalal kale oo ka tirsan Bariga Afrika oo ah suuq ay ku badan yihiin mashaariicda dhismaha sida biyo-xidheennada, waddooyinka waaweyn, Dhismayaasha ganacsiga, Dekedaha, jidadka tareenada iyo Macdan-qodista,” Sidaas waxa lagu sheegay war-saxaafadeed ay soo saartay shirkadda Hyundai Construction Equipment.
Heshiiska dhexmaray labada shirkadood oo u qabsoomay qaab Online ah, waxa u kala saxeexay Madaxa Iibka ee shirkadda Hyundai Construction Equipment, Mr Moon Jae-young oo ku sugan dalka Korea oo shirkadda laga leeyahay iyo Ganacsade Hussain Al-Amoudi oo ku sugan dalka Ethiopia.
“Waxaan rajeyneynaa inaan kordhino saamiga aan ku yeelan lahayn suuqa Bariga Afrika annagoo la kaashanayna NEFC oo saameyn weyn ku leh halkaas, annagoo la midoobayna shirkad saameyn ku leh halkaas sida NEFC oo kale,” waxa sidaas yidhi madaxa Suuq-geynta ee shirkadda HCE.
Dhinaciisa, guddoomiyaha NEFC Group ayaa soo dhaweeyey heshiiska dhexmaray shirkadda Hyundai. “HCE waa shirkad la isku halleyn karo, waxaan ku kalsoonahay in iskaashigayadu gacan weyn ka geysan doono casriyeynta Bariga Afrika iyo ballaadhinta ganacsiga NEFC.” Sidaas ayuu yidhi Ganacsade Hussain Al-Amoudi.
Shirkadda Hyundai waxa gudaha Somailand uga wakiil ah Shirkadda Dahabshiil Group oo heshiis kula gashay in gaadiidkeeda Yar-yar ee ka soo baxa Warshadaheeda si toos ah loogu iib-keeno Somaliland, waxaana badhtamihii sannadkii 2019-kii magaalada Hargeysa laga daah-furay xarun ay leedahay shirkadda Dahabshiil oo lagu iibiyo Gaadiidka ay soo saarto shirkadda Hyundai oo si toos uga yimi wershadda.
Somalilandpost.net
contact@somalilandpos.net
