Hargeysa: Xaflad Meher oo Kulmisay Hal-door badan iyo Shakhsiyaad Bulshada Dhexdeeda Miisaan ku leh (SAWIRRO)

Hargeysa (SLpost)-Waxa shalay magaalada Hargeysa ku qabsoontay xaflad Meher oo si weyn loo soo agaasimay, taas oo la isugu guuriyay Cawaale Maxamed Cismaan Iyo Nagaad Yuusuf Cabdi Gaboobe.

Xafladda meherkaas oo ku qabsoontay hoteelka Maansoor ee Hargeysa, waxa si weyn u camiray qaybaha kala duwan ee hal-doorka bulshada reer Hargeysa amaba Somaliland, waxaana dadka ka qayb galay ka mid ahaa Xaaji Cabdikariim Xuseen (Cabdi-waraabe) oo ah ruug-caddaa lagu tiriyo tiirarka dhidibada u taagay qaranimada Somaliland, Madaxweyne-xigeenkii labaad ee Somaliland Mujaahid Cabdiraxmaan Aw Cali Faarax, Mujaahid Ibraahim Cabdillaahi Xuseen (Dhegaweyne), wasiirro Xukuumadda ka tirsan, Culimo iyo madaxda warbaahinta Somaliland oo si weyn uga dhex muuqday madasha, maadaama oo uu gabadha la soo doonay dhalay Suxufiga Ruug-caddaaga ah ee Yuusuf Cabdi Gaboobe iyo qoysaska reer Cabdi Gaboobe.

Arrinta ugu xiisaha badan ayaa ahayd markii ay koox ciyaaraha dhaqanka oo ka koobnayd afar Wiil ahi ay madashada meherkaasi ku qabsoomay mar keliya albaabka kala soo galeen ciyaar-dhaqameed, taas oo keentay inĀ  dadkii madasha ku sugnaa Shanqadha joojiyaan oo ay isku baxdo sanqadha jaanta iyo jiibta heesaha, iyagoo kooxdani hor socday wakhtigii ay hoolka xafladdani ka dhacaysay ay soo galeen ehelka arooska. Kooxdaas oo haddana mar kale soo gelbiyay Caruuska iyo asxaabtiisii oo waxyar ka dambeeyay.

Waxaana markii ay munaasibaddii meherku dhammaaday halkaas la isku weydaarsaday hadallo kaftan u badnaa, iyadoo madax-dhaqameedka labada dhinac ka socday oo madashaas kaftan isku weydaarsaday ay labaduba qireen in guurkani yahay mid taariikhi ah oo soo nooleeyay dhaqan hore u jiray oo Soomaalidu guurkooda ku salayn jirtay, isla markaana in guurku noqdo mid labada ruux ee is-guursanayaa deegaano kala durugsan ka kala yimaadeen.

Xaaji Cabdikariim Xuseen (Cabdi-Waraabe), oo halkaas hadal kooban ka jeediyay ayaa Alle uga baryay qoyska cusub inuu isu barakeeyo, waxaanu Xaaji Cabdikariim ka sheekeeyay taariikhda Gaboobe oo Nagaad awoowgeed ahaa, kaas oo uu ku tilmaamay Oday isu soo dhawaynta ummadda iyo nabadeynta caan ku ahaa.

Waxa iyaguna halkaas hadallo kaftan iyo Duco ah ka jeediyay Wasiirka Madaxtooyada Xirsi Cali Xaaji Xasan, Xildhibaan Cali Gabiley, Prof. Maxamed Mixile Boqorre oo ah agaasimaha machadka CSI, Sheekh Aadan-Siiro, Chief-Caaqil Cabdirisaaq Caqli, Salaadiin iyo Bahda saxaafadda Somaliland oo iyaguna madasha joogay, waxaanay dadkani dhammaantood Alle ka baryeen inuu isu barakeeyo qoyskaas cusub.

Haddii aanu nahay Guud ahaan bahda saxaafadda Somaliland, gaar ahaan Bahda Shabakadda Somalilandpost, waxaanu hambalyo iyo bogaadin u diraynaa Cawaale Maxamed Cismaan iyo Nagaad Yuusuf Cabdi Gaboobe.

SOMALILANDPOST.NET