Hargeysa (SLpost)- Shirka todobaadlaha ah ee Golaha Wasiirrada Somaliland ayaa baaq loogu jeediyey beesha Caalamka oo loogu soo jeediyey inay dhowraan isla markaana ilaaliyaan Qaranimada Somaliland kuna shaqeeyaan Qawaaniinta iyo Xeerarka dalka u dejisan.
Sida lagu sheegay war-saxaafadeed ka soo baxay madaxtooyada, waxa shirka Golaha Wasiirrada lagu go’aamiyey inaanay hay’adaha caalamiga ah dalka ka fulin karin mashruuc aanay oggolaanshihiisa ka haysan jamhuuriyadda Somaliland, mashruuc aan lala socodsiin hay’adda ku shaqada leh laga fulin karin.
Shirka Golaha Wasiirrada Somaliland oo uu shir-guddoominayey madaxweyne Muuse Biixi Cabdi, waxa sidoo kale lagaga dooday xeerka maalgeshiga Somaliland oo nuqulkiisa loo qaybiyey Golaha.
War-saxaafadeedka maanta ka soo baxay madaxtooyada, ayaa u qornaa sidan:-
“Fadhigii 51-aad ee golaha wasiirrada Jamhuuriyadda Somaliland oo uu shir-guddoominayey Madaxweynaha Jamhuuriyadda Somaliland, Mudane Muuse Biixi Cabdi, kuna wehelinaayey Madaxweyne-ku-xigeenka Somaliland, Mudane Cabdiraxmaan Cabdilaahi Ismaaciil (Saylici), ayaa maanta lagaga dooday laguna ansixiyey xeerar kala duwan.
Golaha wasiirradu waxay dood dheer ka dib ansixiyeen siyaasadda qaran ee maalgashiga, sidoo kale waxa golaha loo qaybiyey nuqullada qabyo qoraalka xeerka maalgashiga, waxaana golaha sharaxaad ka siiyey wasiirka wasaaradda horumarinta maalgashiga iyo garyaqaanka guud ee qaranka.
Dhinaca kale, waxa golaha wasiirrada Jamhuuriyadda Somaliland, waxay mar kale ku celilyeen go’aanka Jamhuuriyadda Somaliland ee xidhiidhka wada shaqayneed ee dalalka caalamka iyo hay’aduhu inuu yahay in beesha caalamku ay Somaliland ula dhaqanto dal madax-bannaan oo aan qayb ka ahayn Soomaaliya, sidaa awgeed, waa in Safiirrada iyo ergooyinka ka socda waddamada caalamka, madaxda ururrada caalamiga ah iyo hay’adaha ka hawlgala gudaha Jamhuuriyadda Somaliland ay dhawraan Qarannimada Somaliland kuna shaqeeyaan xeerarka iyo qawaaniinta Somaliland, waana in aanay ku xadgudbin xuduudaha dhuleed, cireed iyo baddeed ee Jamhuuriyadda Somaliland.
Dhammaan qoraalada (documents) mashaariicaha ay hay’aduhu ka fulinayaan Somaliland waa in ay u isticmaalaan magaca, khariiradda, astaanta iyo calanka Somaliland leedahay ee gaarka u ah, waxa reebban inaan dalka Jamhuuriyadda Somaliland laga fulin Karin mashaariic aan heshiiskooda lala gelin dalka Somaliland, sidoo kale cidna ma fulin karto mashaariic aan oggolaanshahooda laga haysan hay’adda dawladdeed ee ay khusayso.” Sidaas ayaa lagu sheegay war-saxaafadeedka oo uu ku saxeexan yahay Afhayeen Maxamuud Warsame Jaamac
Somalilandpost.net
Somalilandpost@live.com
