Hargeysa (SLpost)- Dr J. Peter Pham oo hore u soo noqday Ergayga Gaarka ah ee Wasaaradda Arrimaha Dibadda Maraykanka u qaabilsan Waddamo ka tirsan Woqooyiga iyo Badhtamaha qaaradda Afrika, ayaa beesha caalamka u soo bandhigay Qarnaqsi ku saabsan sida adduunyadu isaga indho-tirayso horumarka iyo Qaddiyadda Somaliland oo iskeed wax u qabsatay iyo Soomaaliya oo ku taagan oo ku taagan taageerada beesha Caalamka.
Dr J. Peter waxa uu gar-naqsigiisa daliil uga dhigtay is-barbardhig u ku sameeyey Doorashooyinkii Goleyaasha Deegaanka iyo Wakiillada ee sannadkan ka qabsoomay Somaliland iyo doorashooyinka Baarlamaanka iyo madaxtooyada Soomaaliiya oo wakhtigoodu muddo-dhaafay, taas oo loo muddeeyey inay dalkaas ka qabsoomaan dhammaadka sannadkan.
Dibloomaasigan oo xilligan xubin ka ah Atland Council oo ah Gole lagu falan-qeeyo Arrimaha Caalamka ee dhinacyada Siyaasadda, Dhaqaalaha iyo Ammaanka, waxa uu isbar-bardhig ku sameeyey Xaddiga Dhaqaalaha ku kala baxaya iyo Meeqaamka Doorashooyinka labada waddan oo uu kaaf-iyo-kala dheeri ku tilmaamay.
#Somalia🇸🇴 “needs” $29M to hold overdue indirect elections, of which, if things go according to plan, the government will chip in just $1M. In contrast, #Somaliland had direct parliamentary & local elections in May which cost $20M, $15M paid by its people. https://t.co/sLH6rXrODt
— Dr. J. Peter Pham 🇺🇲 (@DrJPPham) September 13, 2021
Dowladda Soomaaliya ayaa hore u shaacisay inay Doorashooyinka Baarlamanka iyo Madaxweynaha ku baxayso lacag dhan $29Milyan oo Beesha Caalamku bixinayso iyadoo nidaamka doorashadu yahay mid dadban oo xulasho ah. Halka Doorashooyinka Somaliland oo shacabku gacantooda ku doorteen mudaneyaasha Baarlamaanka iyo Goleyaasha Deegaanka oo ay ku baxday $20Milyan oo inteeda badan laga bixiyey Miisaaniyadda Dowladda.
Haddaba Dr Peter oo qoraal uu kaga hadlayo kaaf-iyo-kaladheerida labada doorasho ku baahiyey bartiisa Twitter, ayaa yidhi, “Soomaaliya waxay u baahan tahay $29M si ay u qabsato doorasho dadban oo waqtigeedii dhaaftay, taas oo haddii wax waliba u dhacaan sida la qorsheeyey, ay dawladdu ku darsan doonto $1 M oo keliya.”
“Taas cakiskeeda waxa ah in Somaliland ay qabsatay doorashooyin baarlamaan & deegaan oo toos ah bishii May taas oo ay baxday $20M oo $15M ka mid ah Dadkeedu Bixiyeen.” Sidaas ayuu yidhi Dr Peter.
Gar-naqsiga Dibloomasigani isku barbardhigay labada doorasho, ayaa daba-socday codsi Dowladda Soomaaliya dhawaan beesha caalamka ugu dirtay taageero dhaqaale oo Doorashada lagu qabto.
Dowladda Soomaaliya ayaa dhawaan Ururka Jaamacadda Carabta ka dalbatay caawimo maaliyadeed oo dhan $12milyan oo ka mid ah $29 Milyan oo la qorsheeyey inay ku baxayso qabsoomidda Doorashooyinka muddo-dhaafay ee Baarlamaanka iyo Madaxweynaha Soomaaliya.
Wasiirka Arrimaha Dibadda Soomaaliya Maxamed Cabdirisaaq ayaa toddobaadkan sheegay in ururka Jaamacadda Carabtu oggolaaday taageero dhaqaale oo dhan $12 Milyan oo dowladdiisu ka codsatay.
Somalilandpost.net
contat@somalilandpost.net
