Caynabo (SLpost) Waxa maanta lagu caleemoo saaray magaalada Caynabo ee xarunta gobolka Saraar Jiif caaqil ay doorteen beelaha Baalle Wacays ee Reer/Yoonis, waxana loogu qabtay xaflad si heer sare ah loo soo agaasimay hoolka shirarka ee xarunta maamulka gobolka Saraar ee magaalada Caynabo
Xafladda lagu caleemo saaray Jiif Caaqil Cali Ismaaciil Cawad ayaa waxa ka soo qaybgalay masuuliyiinta gobolka Saraar uu ugu horreeyo badhasaabka gobolka Saraar Axmed Cali Nuur, maamulka degmada Caynabo, cuqaal, salaadiin, culimo awdiin, aqoonyahan iyo waxgarad kala duwan oo martisharaf tiro badan oo ka socotay dhammaan qaybaha bulshada degmada Caynabo iyo gobolka Saraar.
Waxa ka mid ahaa madaxdhaqameedka ugu horaynba ka hadlay xafladda caleemo saarka Jiif Caaqil Jaamac Faarax, Caaqil Ibraahim Ciise iyo Xasan Suldaan Ibraahim Suldaan Cali kuwaasoo ku dheeraaday taariikhda Jiif Caaqilka oo ay sheegeen inuu yahay jiif caaqilkii sagaalaad ee beelahaasi yeeshaan, waxanay ilaahay uga baryeen inuu u fududeeyo xilka loo caleemo saaray Jiif Caaqil Cali Ismaaciil Cawad.
Jiif Caaqilka la caleemo saaray ee Cali Ismaacil Cawad oo isaguna ka hadlay madasha ayaa ballanqaaday inuu si daacad ah ugu shaqayn doono beelaha doortay, una gudan doono xilka iyo masuuliyadda loo doortay si hufan oo daacadnimo ku dheehantahay.
Jiif Caaqilka maanta la caleemo saaray ee Cali Ismaaciil Cawad ayaa buuxinaya kaalintan oo uu banneeyay walaalkii Jiif Caaqil Jaamac Ismaaciil Cawad oo geeriyooday sannadkii 2011kii.
Madhax dhaqameedka madasha ka hadlay ayaa sheegay inuu Jiif Caaqilkani yahay kii sagaalad ee ay beelaha Baalle Wacays ee dega gobolka Saraar ay doortaan, waxanay guud ahaanba madaxdii iyo dadweynihii ka soo qaybgalay xafladda caleemo saarka ugu duceeyeen inuu ilaahay u fududeeyo xilka iyo masuuliyadda loo caleemo saaray Jif Caaqil Cali Ismaaciil Cawad.
SOMALILANDPOST.NET