Hargeysa (SLpost)- Aqalka Hoose ee Baarlamaanka Ingiriiska (House of Commons), ayaa shalay dood ka yeeshay Aqoonsiga Somaliland, waxaanay xildhibaannada doodda ka qayb-qaatay dhammaantood isku raaceen muhiimadda ay gobolka iyo dalalka reer Galbeedka oo Ingiriisku u horreeyo u leedahay Somaliland oo aqoonsi ka hesha beesha caalamka.
Mudaneyaasha ayaa u soo jeediyey dowladda Ingiriiska inay qaadato go’aan geesinimo leh isla markaana ay ka shaqayso sidii ay Somaliland uga caawin lahayd inay noqoto Qaran madax-bannaan oo la aqoonsan yahay.
Doodda mudaneyaasha Aqalka Hoose ee Ingiriiska ayaa ka dhalatay mooshin ku saabsan Aqoonsiga Somaliland oo uu golaha horkeenay Xildhibaan Gavin Williamsin oo ka tirsan Xisbiga Conservative-ka ee uu hoggaamiyo raysal-wasaare Boris Johnson. Xildhibaanka ayaa socdaal ku yimi Somaliland xilligii uu ahaa Wasiirka Waxbarashada Dalka UK sannadkii 2019-kii.
Fadhiga Baarlamaanka Ingiriiska ee shalay waxa fadhiyay oo goob-joog ka ahaa doodda lagaga hadlay qadiyadda Somaliland xubno ka tirsan Wasiirrada dalkaas, kuwaas oo la hordhigay su’aalo iyo soo-jeedimo la xidhiidha Aqoonsiga Somaliland.
Haweenay ka tirsan Baarlamaanka UK ayaa dowladda ay ka tirsan tahay hordhigtay qaladka siyaasadeed ee mowqifka Xukuumadda raysal-wasaare Boris Johnson ee khuseeya go’aaminta Aqoonsiga Somaliland.
Xildhibaan Rushanara Ali oo asal ahaan ka soo jeedda waddanka Bangledesh oo ka tirsan dalalkii uu Ingiriisku gumaysan jiray ee ku midaysan Ururka Barwaaqo Sooranka, ayaa sheegtay inay tahay qalad aan layska indho-tiri Karin in Aqoonsiga Somaliland lagu xidho wada-hadallo dhex-mara Soomaaliya, waxaanay su’aasha arrintan ku saabsan weydiisay Wasiirka Arrimaha Yurub u qaabilsan UK, Christ Heaton oo ku sugnaa Fadhiga baarlamaanka.
Haweenaydani waxa ay tusaale u soo qaadatay dalka ay u dhalatay ee Bangledesh xilligii uu olalaha ugu jira madax-bannaanida iyo ka go’o dalka Pakistan xilligaas oo dowladda Ingiriisku taageertay madax-bannaanida Bangledesh, waxaanay fadeexad iyo ceeb ku tilmaantay doodda dowladda UK ee ah in go’aaminta aqoonsiga Somaliland ku xidhan yahay wada-hadal dhexmara Soomaalida.
“Waxaan doonayaa in aan tusaale usoo qaato waddankii aan ku dhashay ee Bangladesh. Dawladdii Ingiriiska ee markaa jirtay waxa ay si toos ah u taageertay gooni isu taagga waddankii aan ku dhashay ee Bangaldesh oo markaa hagankiisii madax bannaanida kula jiray waddanka Pakistan. Dawladda Ingiriisku may odhan Pakistan ha go’aamiso gooni isu taagga Bangaladesh. Wasiirku miyaanu arkayn inay wax lala yaabo tahay in taas cakiskeeda immika la qaato oo la yidhaa Somaliland iyo Somalia iyagu ha dhammaystaan hawlahooga.” Sidaas ayay tidhi xildhibaan Ali.
Doodda mudane Rushanara Ali waxa taageeray isla markaana carrabka ku adkeeyey Xildhibaan Gavin Williamsin oo mowqifka ay dowladda Ingiriisku ku xidhay Aqoonsiga Somaliland ku tilmaamay mid ka soo horjeeda dowlad-wanaagga iyo taageerada ay mudan yihiin dadka wax qabsaday.
“Haddii aynu nidhaa Somaliland iyo Somalia iyagu arrimohooda ha dhammaystaan, waxa aynu go’aanka kama dambaysta ah iyo awoodda oo dhan gacanta u galinaynaa waddan aanay ka jirin nidaam doorashooyin oo xor ah. Waddan aan lahayn nidaam sharci dajineed iyo mid caddaaladeed,” sidaas ayuu yidhi xildhibaan Gavin Williamsin, waxaanu intaas ku daray oo yidhi, “Haddii aynu sidaa yeelno, waxaynu si toos ah u dhiirri-galinaynaa dawlad-xumada. Kuwii iyagu dawlad wanaagga samaystay ee horumarka iyo qiyamka wanaagsan la yimi oo ay ahayd in aynu garab-istaagnana, waynu curyaaminaynaa”.
Doodda ku saabsan Aqoonsiga Somaliland ee shalay, ayaa noqonaysa markii u horeysay ee hay’adaha Sharci-dejinta ee Ingiriisku miisaan intaas le’eg siiyaan Qadiyadda Somaliland maadaama oo meeqaamka la siiyey iyo doodaha xildhibaannada Baarlamaanka Ingiriiska ee taageerada u muujiyey ay ka mid yihiin Guulaha siyaasadeed Qadiyadda Aqoonsi-raadinta Somaliland.
Somalilandpost.net
contact@somalilandpost.net
