Hargeysa (SLpost)- Carwada 15-aad ee Bandhigga Caalamiga ah ee Buugaagta Hargeysa, ayaa maalintii shanaad maanta si xidhiidh ah uga socday Xarunta ee Dhaqanka ee Hargeysa.
Munaasibadda sannad laha ah ee Carwada 15-aad ee Caalamiga ah ee Bandhigga Buugaagta Hargeysa, ayaa maalintiisii shanaad si qoto dheer loogu lafa-guray, muhiimadda ay leedahay in wixii kayd ah loo beddalo casriga dhijitaalka ah.
Mawduucan oo uu ibo-furay guddoomiyaha xarunta dhaqanka ee hargeysa Dr Jaamac Muuse Jaamac, ayaa si xeel dheer uga hadlay muhiimadda ay leedahay in la kaydiyo wixii maskax iyo cajaladba ku jira, isla markaana loo rogo nidaamka dhijitaalka, si aanay u lumin wixii hadda la hayo, iyadoo laga hor tagayo inay lumaan taariikhda, afka soomaaliga, suugaanta, aqoonta iyo wixii la hal-maala ee ku duugan maskaxda dadka iyo cajaladihii hore, taas oo uu Dr Jaamac ku tilmaamay, in ay ayaan-darro tahay in marka shakhsi wayn bulshada ka baxo ee uu la dhinto wixii maankiisa ku duugnaa, ay la mid tahay maktabad gubatay.
Haddii cajaladaha loo beddalo dhijitaal maxaa soo baxaya?
Weydiintan oo ahayd ta ugu mudan ayuu Dr Jaamac isagoo qodobbaynaya kaga war celiyey, waxaanu si qodobaysan u sheegay:-
- In aanay marnaba hallaabayn kaydka la hayaa.
- In jiilka mustaqbalku u aayi doonaan kaydkaa.
- In Cilmi-baadhayaasha faca soo socda ay u fududaan doonto sidii ay ku heli lahaayeen xog 50 sanno ka hor ahayd.
- In waxa la kaydinayaa aanay kaliya ahayn cajaladaha, ee la kaydin doono agabkii hore iyo af-guriga iyo mood iyo nool wixii ku gubtay suuqa waaheen, si ay xusuus iyo taariikh ugu noqoto ayniga soo socda mustaqbalka.
- In ay dhawrsanaan doonto xuquuqda qof kasta oo taariikh, suugaan iyo aqoon reebay oo aanay dhici doonin in cid kale sheegato wax ayna lahayn.
- In dadka aragga iyo maqalka naafada ka ah ay qoraal iyo dhageysiba ku heli karaan kaydka loo beddalay dhijitaalka, iyadoo dadkaas loo soo wado barnaamij u sahlaya helitaanka wixii la kaydiyey.
- In la sawiri karo wixii dhacay waqtiyadii hore
- In la qori doono wax kasta oo kaydka lagu hayo
Dhinaca kale, Xafsa Cumar oo ah Maamulaha u xil-saaran isku beddalidda kaydka iyo dhijitaalka, ayaa mawduucan ka qayb qaadatay, iyadoo xustay in hawshaas mugga lehi mudnaanteeda leedahay.
Xafsa oo is dul taagtay arintaa ayaa sheegtay, in waddanka ingiriisku qaatay kayd badan oo ay somaliland lahayd, taas oo ay ku sababaysay in aan muhiimadda kaydintu leedahay aanay weli bulshada badankeedu fahmin, “Maaddaama aynu haysan kari waynay waa la qaatay, waana in aynu soo ceshannaa wexeenna”
Xafsa ayaa bulshada somaliland ka codsatay in wixii kayd la hayo lagu soo xareeyo xarunta muusiyamka ee kaydka.
Nerisa Kamar oo ah isku duwaha iyo wakiilka ururka warfaafinta africa ee (IAO) oo si toos ah uga soo hadlaysay qalabka skeype-ka.
Nerisa Kamar oo ka soo hadlaysay waddanka kenya ayaa bogaadisay fikradda wax lagu kaydinayo.
Dr. Jaamac Muuse Jaamac, ayaa sheegay in ay jiraan dhawr iyo labaatan dowladood oo Afrikaan ah, dowladahaas oo ay somaliland ku jirto ayaa sameeyey barnaamij isku xidhaya maktabadaha dowladda, barnaamijkaas oo anfici doona jaamacadaha iyo bulshadaba, wuxuna xusay in guddida dowladahaasi ay kulmaan bishiiba hal mar.
Dr. Jaamac ayaa sheegay in xarunta kaydaka lagu hayo in ku dhow afar iyo tobon kun oo cajaladood iyo shan iyo soddon Riwaayadood oo kuwii hore ah.
