Burco, (SLpost)- Kulankii ugu horreeyey ee tartanka Ciyaaraha Gobollada Somaliland ayaa maanta waxa isku haleelay gobollada Maroodijeex iyo Togdheer.
Kulankan dhexmaray labada gobol oo xiisihiisa aad loo sugayay ayaa abbaaro 4:00 galabnimo ee maanta ka bilaabmay garoonka loogu talo galay ciyaaraha gobollada dalka ee Almazey, waxaana munaasibadda furitaanka ciyaaraha wakhti yar ka hor bilowga ciyaarta xadhigga ka jaray madaxweyne ku-xigeenka Somaliland Md. Cabdiraxmaan Ismaaciil ‘Saylici’.
Ciyaarta dhex martay xulalka labada gobol ayaa ku bilaabmatay jawi deggen iyada oo ciyaartoyga labada dhinac ay soo bandhigeen kubbad xiise leh, iyada oo weliba koox waliba markeeda weerar ku qaadaysay goolka kooxda ka soo horjeedda, waxaana jiray fursado badan oo ay labada dhinacba heleen balse ay ka faa’idaysan waayeen.
In kasta oo ay jireen fursado dhowr ah oo dhinac waliba dayacay, haddana waxay xamaasaddii ciyaartu cirka isku shareertay ka dib markii xulka gobolka Maroodi-jeex ay u suurto-gashay inay gool kaga naxsadaan xulka martida loo ahaa kaas oo sababay inay ciyaartu isku beddesho weji kale oo ciyaartu isku beddeshay in culays xoog badani ku yimaaddo goolka xulka gobolka Maroodijeex in kasta oo ay jireen fursado kooxda goolka ku hormartay ay la galeen diilinta 18aad ee goolka xulka Togdheer.
Intii lagu gudo jiray daqiiqadihii ugu dambeeyey ee qaybta hore ee ciyaarta, labada kooxoodba waxa ay xoojiyeen oo qaab-ciyaareedkoodu u batay inay miisaanka saaraan Dhexda taas oo sababtay inay weerarka kubaddu tallan-taali u noqoto labada gool.
Qaybtii hore ee ciyaarta ayaa ku soo gabo-gabowday 1-0 uu gobolka Maroodi-jeex guusha ku hoggaaminayo. Balse markii laysugu soo noqday qaybtii dambe ee ciyaarta, koox walibana dhankeeda ka soo talo-goosatay, xulka gobolka Togdheer waxay soo galeen garoonka iyada oo uu ku taagan yahay goolka lagaga horumaray iyaga oo sida muuqatay isu arkayey inay guusha hantiyaan maadaama ay fursad u heleen inay martigaliyaan tartanka gobollada dalka.
Markii ay ciyaartu socotay muddo daqiiqada ah isla markaana labada xulba wax-ka-beddel ku sameeyey qaabciyaareedkoodii, waxa gobolka Togdheer u suurto-gashay inay keensadaan goolkii Barbarraha oo runtii ahaa mid aad u qurux badan oo dadkii ciyaarta daawanayey ay la dhaceen qaabkii loo soo agaasimay iyo siduu u dhashay.
In kasta oo labada xulba ay soo bandhigeen qaab-ciyaareed aad u qurux badan, haddana waxa uu kulankoodu ku dhammaatay barbarro 1-1 ah ciyaartuna waxa ay ku dhammaatay iyada oo labada xul, Kooxda Martida loo yahay iyo kooxda Caasimadda ka socotay, aanay gaadhin natiijadii ay rabeen oo sida muuqata ahayd in midba dhankiisa guul ka filayey.
Somalilandpost.net
Contact@somalilandpost.net
